بھٹکل  :9/ اگست (ایس اؤ نیوز)  موجودہ دور میں نصاب کی طرح غیر نصابی سرگرمیوں کو اہمیت دی جارہی ہے۔ کیونکہ ادب، کھیل ، ثقافتی پروگرام طلبا کی زندگی میں اہم رول ادا کرتے ہیں۔ طلبا کی چوطرفہ اٹھان کے لئے ایسے پروگرام اہم ہونے کابھٹکل تعلقہ بلاک ایجوکیشن آفیسر ایم آر مونجی نے خیال ظاہر کیا۔

جمعرات کو شہر کے نونہال ہائی اسکول میں بلاک ایجوکیشن آفس بھٹکل ، محکمہ تعلیمات عامہ اترکنڑا کے اشتراک سے منعقدہ بھٹکل تعلقہ زون لیول ہائی اسکول طلبا کے پرتیبھا کارنجی پروگرام کا افتتاح کرنے کے بعد وہ خطاب کررہے تھے۔ زونل وسائلی آفیسر یلما مری سوامی نے خطاب کرتے ہوئے کہاکہ اسکول کی سطح پر ہونہار طلبا کی نشاندہی کی ذمہ داری اساتذہ کی ہوتی ہے ، طلبا میں تفریق کئے بغیر ہر ایک بچے کو مساوی موقع دینے کی اساتذہ سے اپیل کی۔ سی آر پی سعیدہ فاطمہ النساءکی رہنمائی میں تمام ثقافتی مقابلہ جات منظم انداز میں منعقد کئے گئے۔ ڈائس پر نونہال تعلیمی ادارے کے صدر شبیب کولا، سکریٹری گل افروز، صدر مدرسہ سویتا پربھو ، سعیدہ فاطمہ النساء موجود تھے۔ اسی طرح بھٹکل تعلقہ پرائمری اسکولوں  کے مابین  پرتیبھا کارنجی ثقافتی مقابلہ انجمن پرائمری اسکول بھٹکل میں منعقد ہوئے۔