کووِڈ ضوابط کی خلاف ورزی پر کارروائی ، ہائی کورٹ نے حکومت کو لتاڑا
بنگلورو،24؍مارچ (ایس او نیوز) ہائی کورٹ نے ریاست میں مختلف ریلیوں، احتجاج اور تقاریب کے دوران کووِڈ ضوابط کی خلاف ورزی کرنے والوں کے خلاف فوجداری مقدمہ درج نہ کرنے پر ریاستی حکومت کو لتاڑا ہے۔
سماج کے معزز افرادکی جانب سے ہی کووِڈ ضوابط کی خلاف ورزی کا الزام لگاتے ہوئے اڈوکیٹ گیتا مشرا اور لیٹز کٹ فاؤنڈیشن کی جانب سے دائر مفاد عامہ عرضیوں کی سماعت کرتے ہوئے چیف جسٹس اے۔ ایس۔ اوک کی قیادت والی ڈویژنل بنچ نے حکومت کو لتاڑا۔
عرضی گزاروں نے الزام لگایا کہ ریلی، احتجاج اور مختلف تقاریب کی حکومت نے اجازت دی ہے جہاں کووِڈ ضوابط جیسے ماسک پہننا، سینی ٹائزر کا استعمال اور سماجی دوری اختیار کرنے پر عمل نہیں کیاجارہا ہے۔
انہوں نے الزام لگایا کہ حکومت کووِڈ ضوابط کی خلاف ورزی کرنے والوں پر صرف جرمانہ عائد کررہی ہے،جبکہ ان کے خلاف فوجداری مقدمات درج کئے جاتے ہیں۔ بنچ نے افسوس ظاہر کرتے ہوئے کہا کہ حکومت خود کووِڈ معاملات میں اضافہ کا سبب بن رہی ہے۔