بنگلورو،22؍جنوری(ایس او نیوز) وزیر اعلیٰ بی ایس ایڈی یورپا کے فرزند بی وائی وجیندرا کو جمعرات کے روز اس وقت راحت مل گئی جب ریاستی ہائی کور ٹ نے رام لنگم کنسٹرکشن نامی کمپنی سے رشوت لینے کے متعلق ان پر لگائے گئے انتظامات کی جانچ سی بی آئی سے کروانے کی عرضی خارج کردی۔ جن ادھیکار سنگھرش پریشد کی طرف سے اس ضمن میں دائر مفاد عامہ عرضی کی سماعت کرتے ہوئے چیف جسٹس ابھے سرینواس اوکا کی قیادت والی بینچ نے یہ احکامات صادر کئے۔
بینچ نے تبصرہ کیا کہ عرضی گزاروں نے دعویٰ کیا ہے کہ اس معاملے میں پولیس کی طرف سے اب تک ایف آئی آر درج نہیں کی گئی ہے۔ چونکہ ایف آئی آر درج نہیں کی گئی ہے اس لئے کیس کومنتقل نہیں کیا جا سکتا۔ عدالت نے تبصرہ کیا کہ اس معاملہ میں عرضی گزار انصاف کے لئے کوئی بھی طریقہ اپنانے کے لئے آزاد ہیں۔ عرضی گزاروں نے عدالت کو بتایا کہ 2اور 17ستمبرکے دوران رام لنگم کنسٹرکشن نامی کمپنی کے ذریعہ وزیر اعلیٰ ایڈی یورپا کے فرزند وجیندرا اور نواسے ششی دھر مرڈی کے بے نامی بینک کھاتوں کو کروڑوں روپیوں کی رقم کی ادائیگی کی گئی ہے چونکہ الزامات کی نوعیت انتہائی سنگین ہے اس لئے معاملہ کی جانچ سی بی آئی کے ذریعے کروائی جائے۔
چونکہ الزامات وزیر اعلیٰ، ان کے فرزند اور دیگر رشتہ داروں پر ہیں اس لئے ممکن ہے کہ اثرورسوخ کے ذریعے تحقیقات کو دبادیا جائے۔ اس لئے عدالت کی طرف سے سی بی آئی جانچ کے احکامات دئیے جائیں۔ عدالت نے اس گزارش کو مسترد کردیا۔