بنگلورو17اگست(ایس او نیوز) بنگلورو،حیدرآباد،راجدھانی دہلی اور ممبئی پر ممکنہ حملوں کے متعلق خفیہ محکمے کی رپورٹوں کے بعد ملک کے ان چاروں شہروں میں ہائی الرٹ کا اعلان کردیا گیا ہے۔شہر کے پولیس کمشنر بھاسکر راؤ نے شہر میں ریڈ الرٹ کا اعلان کردیا ہے۔ پولیس ذرائع نے شہر میں ریڈ الرٹ کی تصدیق کرتے ہوئے بتایا کہ شہر کے حساس مقامات پر کے ایس آر پی اور سریع الحرکت فورسس کو تعینات کیا جا چکا ہے۔شہر کے پولیس کمشنر نے بھی شہر بھر میں افزود فورسس کی تعیناتی کی تصدیق کی ہے۔خفیہ محکمے نے اندیشہ ظاہر کیا ہے کہ شہر کے حساس مقامات کو دہشت گردانہ حملوں کا نشانہ بنانے کی کوشش کی جا سکتی ہے۔ اس سے نپٹنے کے لئے پولیس فورس کو ہمہ وقت مستعد رہنے کی ہدایت دی گئی ہے۔کمشنر نے محکمے کو جاری کئے گئے میمو میں کہا ہے کہ شہر بھر میں جا بجا ناکہ بندی کی جائے۔ یہ یقینی بنایا جائے کہ شہر بھر کے تمام سی سی ٹی وی کیمرے کام کررہے ہیں۔عوامی مصروف علاقوں میں پولیس فورس کی موجود گی کو غیر معمولی تعداد میں بڑھایا جائے۔۔ شہر میں کہیں بھی اگر کوئی لاوارث بیگ یا ساز وسامان ملے تو اسے ضبط کرلیا جائے۔پی جی ہاسٹلوں،سرویس اپارٹمنٹس اور مذہبی مقامات کے قریب موجود رہائشی سہولتوں کی تلاشی لی جائے۔