ہوناور 21؍فروری (ایس او نیوز) گیر سوپّا ڈیم کے علاقے میں گھنے جنگل سے گزرنے والی 33کے وی بجلی لائن کا معائنہ کرنے کے لئے نکلی ہوئی ہیسکام افسران اور عملے پر مشتمل ایک ٹیم میں شامل دوافسران جنگل میں راستہ بھٹک گئے جس کی وجہ سے انہیں پوری رات جنگل ہی میں گزارنی پڑی ۔

ذرائع سے ملی اطلاع کے مطابق بجلی لائن کا معائنہ کرنے  کے لئے نکلی ہوئی ٹیم میں شامل ایکزیکٹیو انجینئر ایم ایچ کلکرنی اور جونیئر انجینئر شنکر بینگی نامی افسران کے جنگل میں راستہ بھٹک جانے کا واقعہ منگل کے دن پیش آیا تھا۔ ہیسکام کی ٹیم دوپہر کے وقت جنگل میں داخل ہوئی تھی۔ پھر تھوڑی دور جانے کے بعد یہ دو افراد بسکٹ اور پانی لانے کے لئے واپس شہری علاقے میں آئے اور بقیہ افراد کو ایک ہی مقام پر رکے رہنے کی تاکید کی۔ مگر پیاس کی شدت سے پریشان دو انجینئر پانی کی تلاش میں جنگل ہی میں دوسری طرف نکل گئے اوربقیہ لوگ آگے نکل گئے۔اس وجہ سے دو افسران اپنے ساتھیوں کی تلاش میں خود ہی راستہ بھٹک گئے۔ رات ہوجانے پر وہ دونوں خوفزدہ ہونے کے باوجود ایک دوسرے کی ہمت بندھاتے رہے۔دوسری طرف محکمہ جنگلات کے دیگر افسران نے ان دو گم شدہ افسران کے تعلق سے پولیس کو اطلاع کردی۔

بتایا جاتا ہے کہ جنگل میں گم ہونے والے دونوں افسران کو ہائی بلڈ پریشر اور شوگر کا مرض لاحق ہے۔ بتایا گیا ہے کہ جنگل میں  رات کے وقت کلکرنی نامی افسر کی طبیعت زیادہ  بگڑ گئی تو شنکر بینگی نے ان کو سنبھالے رکھا۔پھر جب صبح ہوئی تو موبائل پر نیٹ ورک بھی ملنے لگا ۔ اس وقت انہوں نے اپنی ٹیم کے بقیہ افراد سے رابطہ قائم کرکے بتادیا کہ وہ اس وقت کس مقام پر پھنسے ہوئے ہیں۔ جس کے بعد  انہیں تلاش کرلیا گیا اور علاج کے لئے اسپتال میں داخل کردیا گیا۔