نیسرگا‘طوفان کے دوران طوفانی ہوا اور بارش سے ہیسکام کو کاروار میں ایک ہی دن 8لاکھ اور بھٹکل میں 1 لاکھ سے زائد کا نقصان
بھٹکل 4/جون (ایس او نیوز) مہاراشٹرامیں تباہی مچانے والا ’نیسرگا‘ طوفان ویسے تو کرناٹکا کے ساحلی علاقے کو چھوتا ہوانکل گیا، مگر جاتے جاتے بھٹکل سمیت کاروار شہر اوراطراف میں اپنے اثرات ضرور چھوڑ گیا۔
اطلاع کے مطابق انکولہ کاروار سب ڈیویژن کے حدود میں تیز ہواؤں اور برسات کی وجہ سے الیکٹرک کھمبے اکھڑجانے اور درختوں کی شاخیں گرنے کی وجہ سے بجلی کے تار ٹوٹ گئے جس سے پانچ سے زائد گھنٹوں تک بجلی منقطع ہوگئی اور ہیسکام کو ایک ہی دن کے اندر 8لاکھ روپوں کا نقصان پہنچا۔معلوم ہوا ہے کہ تقریباً 72 بجلی کے کھمبے اکھڑ کر گر گئے ، 9ٹرانسفارمرس کو نقصان پہنچا ، وہیں بھٹکل میں بھی سات الیکٹرک کھمبے اُکھڑ گئے اور تین ٹرانسفارمر کو نقصان پہنچا جس سے ایک لاکھ سے زائد مالیت کا نقصان ہوا ہے۔
ایسے حالات سے نمٹنے کے لئے محکمہ بجلی کے اہلکار بالخصوص لائن مین بجلی کے تاروں کو جوڑنے اور جلد سے جلد بجلی بحال کرنے میں مسلسل مصروف نظر آئے۔