گلبرگہ میں گزشتہ چار دنوں سے زبردست بارش ، ٹریفک متاثر،نشیبی علاقوں میں کئی مکان منہدم
گلبرگہ،17ستمبر(ایس او نیوز؍حکم شاکر) ضلع گلبرگہ میں گزشتہ چار دنوں سے زبردست بارش ہورہی ہے جس کے سبب ضلع کے کئی ایک علاقوں میں عوام کو بری مشکلات کا سامنا کرنا پڑ رہا ہے۔ ضلع گلبرگہ کے نشیبی علاقوں میں زبردست بارش کے سبب بہت سے مکانات منہدم ہوگئے ہیں اور ٹریفک بھی بہت حد تک متاثر ہوگئی ہے۔ سدیشور نگر گلبرگہ میں ایک مکان کے منہدم ہوجانے کے سبب منگل کے دن تین افراد زخمی ہوگئے ہیں۔
گلبرگہ کے نواحی علاقوں ہاگرگہ اور خواجہ کنور میں دو افراد ایکتیزی سے بہتے ہوئے نالہ میں بہنے لگے تھے لیکن انھیں فائیر اینڈ ایمرجنسی سروس کے عملہ نے بچا لیا۔ پوجا کالونی کے کئی ایک مکانات اور کسنور روڈ کے علاقہ راجی جی نگر، شاہ آباد روڈ کے چند علاقے، گلبرگہ شہر میں گنگا نگر کے علاوہ سرگاپور و مالیگاؤں تعلقہ کملاپور میں سیلابی کیفیت سے پانی گھروں میں داخل ہوگیا اور ساز و سامان کا کافی نقصان پہنچا۔ اٹگا، خواجہ کوٹنور اور بولے واڑ گاؤں میں سیلابی کیفیت سے کوروار کا پل پانی کے نیچے آگیا ہے۔ جس کے سبب کالگی اور گلبرگہ کے درمیان کے یاستی ہائی وے کی ٹریفک بھی متاثر ہوگئی ہے۔ کئی ایک بسیں، ٹرکس، ٹریکٹرس اور دیگر موٹر گاڑیاں منگل کی صبح اس برج کے دونوں جانب پھنس کر رہ گئی تھیں۔
چیتاپور تعلقہ میں بھی زبردست بار ش ہوئی ہے موضع ہنڈا پور کے قریب ایک پل کے زیر آب ہوجانے کے سبب دیگر دیہاتوں سے آمد و رفت کا ربط ٹوٹ چکا تھا۔ بینی تھورا کیانل سے متصل کئی ایک زرعی کھیتوں میں بھی پانی جمع ہوگا ہے۔سیلابی پانی کے سبب متی موڑو اور انگنکل کے درمیان ٹریفک رابطہ ٹوٹ چکا تھا۔ موضع گنگرتی میں اور بہار پیٹ میں کئی ایک مکانوں میں سیلابی پانی داخل ہوچکا تھا۔
شہر گلبرگہ میں گزشتہ چار دنوں کی زبردست بارش کے سبب کاروبار متاثرہوئے ہیں۔ کئی ایک محلوں کی سڑکوں پر پانی جمع ہوجانے سے ٹریفک بری طرح متاثر ہورہی ہے۔ سونیا گاندھی کالونی، فردوس کالونی ِ خواجہ کالونی، ہاگرگہ روڈ، کے بی این کالج روڈ، درگاہ روڈ، نیا محلہ۔ ایمایسکے ملز وغیرہ میں زبردست بارش کے سبب سڑکوں کا نقصان پہنچا ہے۔ جگہ جگہ پانی جمع ہوجانے سے اور کیچڑکے پھیل جانے کے سبب آمد و رفت مشکلہوگئی ہے۔ شہر گلبرگہ میں آمد و رفت کو بہتر بنانے اور مختلف کچے راستوں کی رکاوٹوں کو دور کرنے کے لئے شہریان گلبرگہ منتخب ارکان اسمبلی و پارلیمینٹ اورضلعی انتظامیہ سے امیدیں رکھرہے ہیں کہ شہر گلبرگہ کے مختلف محلوں کی کچی اور ٹوٹی پھوٹی سڑکوں کو پختہ سڑکوں میں تبدیل کیاجائے۔ پانی کے بہنے کے لئے اور اسے سڑکوں پر جمع ہونے سے روکنے کے لئے مناسب نالیوں کی تعمیرکاانتظام کیاجائے۔