بنگلورو:25؍اپریل(ایس اؤ نیوز)جمعہ کی صبح شہر میں قریب نصف گھنٹے تک برسی تیز رفتار بارش کے نتیجےمیں پریتی نگر علاقے کی سڑک کھسکنے سے کار، بائک،آٹو سمیت کئی سواریوں کو نقصان پہنچنے کے علاوہ 28سے زائد بڑے بڑے درخت زمین بوس ہونے کی اطلاعات موصول ہوئی ہیں۔
بی بی ایم پی حدود کے پریتی نگر میں سڑک کے نیچے اندرونی نالیوں کے پائپ بچھائے گئے تھے۔ خستہ کام کی وجہ سے پائپ والی سڑک قریب ایک کلو میٹرسے زائد دوری تک دھنس گئی ہے۔بارش جاری رہتے لگیرے کے لکشمی نگر میں دیوار گرنے سے آٹو، کار سمیت 15سواریوں کو نقصان پہنچا ہے۔ دو اپارٹمنٹ کے درمیان دیوار باندھی گئی ہے۔ ایک اپارٹمنٹ نشیب میں ہے تو دوسرااپارٹمنٹ 8فٹ اونچائی پر ہے ۔ دیوار گرتے ہی اونچائی پر واقع اپارٹمنٹ کی سواریاں پھسل سے نیچے چلے جانےکی چشم دید وں نے جانکاری دی ۔ اس کے علاوہ مارگوسا روڈ، یشونت پور پولس تھانہ ، مارین ہلی ، بی ٹی ایم لے آؤٹ، بسون گڑی، راجاجی نگر، نندی درگ روڈ، تمیا روڈ، اوپارپیٹھ پولس تھانہ ، بسویشور نگر پنیا اسپتال ، اگرہار داسرہلی اسپتال، موڈلپالیا سمیت دیگر علاقوں میں بڑے بڑے درخت زمین بوس ہوئے ہیں۔ شہر کے مختلف جگہوں پر درختوں کے زمین بوس ہونےکی اطلاع ملتے ہی بی بی ایم پی کا عملہ جائے وقوع پہنچ کر درختوں کو نکال باہر کرنے کے کاموں میں مصروف ہوگیا اور اس طرح فوری کام کرتے ہوئے ٹرافک کو راستہ صاف کیا۔
محکمہ موسمیات کی طرف سے جاری کردہ جانکاری کے مطابق 25اپریل کو ریاست کے جنوبی اندرونی علاقوں میں بجلی اور گرج کے ساتھ بارش ہونے کے امکانات ہیں۔ جس میں بنگلورو دیہی علاقے ،بنگلورو شہر، چک منگلورو، ہاسن ، کورگ ، شیموگہ اور رام نگر اضلاع شامل ہیں۔ جہاں زرد الرٹ جاری کیاگیا ہے۔ اسی طرح ساحلی علاقوں کے کچھ مقامات پر معمولی بارش ہوسکتی ہے۔