منگلورو23/جولائی (ایس او نیوز) پچھلے چار پانچ دنوں سے ضلع  جنوبی کینرا ، اُڈپی اور شمالی کینرا  میں جاری تیز بارش کی وجہ سے بھاری نقصانات کی خبریں مل رہی ہیں۔ چونکہ محکمہ موسمیات نے 27جولائی تک تیز بارش کا سلسلہ جاری رہنے کی پیشین گوئی کی ہے اس لئے ضلعی انتظامیہ نے ساحلی کرناٹکا میں   ریڈالرٹ جاری کیا ہے۔

 خیال رہے کہ دو دن پہلے ضلعی انتظامیہ نے خراب موسم کو دیکھتے ہوئے’اورینج الرٹ‘ جاری کیا تھا۔اب ریڈ الرٹ جاری کرنے کے ساتھ تمام سرکاری اور نجی اسکولوں اور کالجوں کے لئے ایک دن کی چھٹی کااعلان کیا ہے۔ ضلعی انتظامیہ کی طرف سے جاری کیے گئے بیان میں عوام،سیاح اور ماہی گیروں کو سمندری کناروں، ساحلوں، ندیوں اور تالابوں سے دور رہنے کی ہدایت کی گئی ہے۔

پیر کے دن ہوئی تیز بارش کی وجہ سے مینگلور کے کنکن ناڈی جنکشن کے پاس صبح کے وقت ایک بڑا درخت گرگیا، جس کی زد میں آنے سے بائک سوار نوجوان اور ایک طالبہ زخمی ہوگئے۔شہر کے مختلف مقامات پر مصنوعی سیلاب کی کیفیت پیدا ہوگئی جس سے عوامی زندگی ابتر ہوگئی۔ کونجات بیل نامی علاقے میں ایک گھر کا نصف حصہ ڈھل گیاجبکہ گھر والوں نے احتیاطی تدبیر کرتے ہوئے مکان کو پوری طرح گرنے سے بچالیا۔ امبلاموگارو علاقے میں چٹان کھسکنے سے عباس اورعبدالرزاق نامی افراد کے گھروں کوبڑاخطرہ لاحق ہوگیا ہے۔اس علاقے میں مزید پہاڑی حصہ کھسکنے کا خدشہ دکھائی دے رہا ہے۔کئی مقامات پر الیکٹرک کھمبے اکھڑنے سے موٹر گاڑیوں کو نقصان پہنچنے کی بھی خبر ملی ہے۔

 فالنیر کے علاقے میں مین ڈرینیج بھر کر پانی ابلنے لگا توگھروں میں گندا پانی گھسنے کی وجہ سے مقامی لوگوں کے لئے بڑی مصیبتوں کا سامنا کرنا پڑا۔ شہر کے مختلف علاقوں میں گندے پانی کی نکاسی اور فٹ پاتھ کی مرمت کا کام برسات کی وجہ سے ادھورا چھوڑ دیا گیا ہے اور اس سے برساتی پانی کی نکاسی اور ٹریفک کے لئے میں بہت زیادہ مسائل پیدا ہورہے ہیں۔امبیڈکر سرکل، ملّی کٹّے جیسے علاقوں میں عوام کو اس طرح کے مسائل کا بہت زیادہ سامنا کرنے کی نوبت آئی ہے۔

محکمہ موسمیات کے ذریعے جاری کیے گئے اعداد وشمار کے مطابق پیر کے دن 24گھنٹوں کے دوران ضلع جنوبی کینرا میں اوسطاً 66.8ایم ایم بارش ہوئی ہے۔ بنٹوال میں 66.5،بیلتنگڈی میں 65.2، منگلورو میں 76.4، سولیا میں 51اور پتور میں 75ایم ایم بارش ریکارڈ کی گئی ہے۔