بنگلورو22/اکتوبر (ایس او نیوز)کرناٹک کے شمالی اضلاع، ملناڈ اور مرکزی علاقوں میں امسال اکتوبر میں دوبارہ موسلادھار بارش کی وجہ سے عام زندگی مفلوج ہو کر رہ گئی ہے۔ مسلسل بارش سے شمالی کرناٹک کے اضلاع میں کھڑی فصلیں برباد ہوجانے سے کاشتکاروں کی مصیبتوں میں اضافہ ہوگیا ہے۔ بارش کی وجہ سے شمالی کرناٹک کے علاقوں میں دو افراد ہلاک ہوگئے ہیں اور کئی کچے مکانات ٹوٹ گئے ہیں۔ جگہ جگہ راستوں اور پلوں پر سے پانی جم جانے سے رابطہ ٹوٹ گیا ہے۔ 

گزشتہ رات ہوئی بارش کی وجہ سے ایک چھوٹا سا نالہ پر آب ہو کر بہنے لگا۔ اس نالہ کو دیکھنے گیا ہو ایک لڑکا پیر پھسل کر گرنے سے نالے میں بہہ گیا ہے۔ یہ وارادات رانی بنور کے قریب رونما ہوئی ہے۔ نالے میں بہہ جانے والے لڑ کی شناخت 13سالہ شعیب کے طور پر کی گئی ہے۔ ایک اور شخص بھی اس علاقہ میں سیلابی ندی کے پانی میں بہہ گیا ہے۔ 300سے زائد مکانات بیٹھ گئے ہیں۔ 

بلگاوی ضلع کے خانہ پور تعلقہ کسم گلی دیہات میں مکان گرجانے سے 55سالہ لیاقت مکاندار کی ملبہ میں دب کر موت ہوگئی۔ ہاویری ضلع ہیرے کیرور ٹاؤن میں شعیب برساتی نالے میں بہہ کرفوت ہوا ہے۔ پورا علاقہ اور کھیت بارش کے پانی کی زد میں آگیا ہے اور یہاں کھڑی فصلوں کو نقصان پہنچا ہے۔ بنگلورو شہر میں گزشتہ ایک ہفتہ سے مسلسل بارش سے ٹرافک بری طرح متاثر ہورہی ہے۔ بلگاوی، دھارواڑ، چترادرگہ، باگل کوٹ، ہاویری، گدگ، ہبلی ضلع میں زوردار بارش ہورہی ہے۔ 

وہیں کرناٹک کے منگلورو، اُڈپی، کاروار، بھٹکل کے علاوہ چکمگور، شیموگہ، ہاسن اضلاع میں بھی مسلسل بارش سے فصلیں تباہ ہوگئی ہیں۔ چارمڑی گھاٹ اور کلسا موڈگیرہ روڈ پر جگہ جگہ زمین کھسکنے سے دوبارہ یہ راستے بند کردیئے گئے ہیں۔ بارش کی وجہ سے دھان، کافی، کالی مرچ، پیاز، جواز، مرچ، راگی وغیرہ کی فیصلیں تباہ ہوئی ہیں۔