جنوبی کینرا میں طوفانی ہوا اور بجلیوں کے ساتھ ہوئی زبردست بارش ۔ بھٹکل کے کئی مقامات پر ہوئی ہلکی پھلکی بوندا باندی
منگلورو ،30؍ مارچ (ایس او نیوز) کل شام ساڑھے سات بجے کے آس پاس منگلورو شہر اور مضافات اچانک طوفانی ہوائیں چلنے لگیں جس کے بعد بادلوں کی گرج اور بجلیوں کی کڑک کے ساتھ زبردست برسات شروع ہوگئی۔ ضلع کے دوسرے مقامات جیسے پتور، بنٹوال، سولیا، کڈبا، بیلتنگڈی، مُلکی، موڈبیدری وغیرہ سے بھی بے موسم کی برسات ہونے کی خبر ملی ہے۔
ذرائع سے ملی اطلاع کے مطابق منگلورو شہر میں خطرناک انداز میں بجلیاں کڑکنے لگیں اور طوفانی ہوائیں چلیں تو کئی مقامات پر دخت اکھڑ گئے۔ دو مندروں میں پرچم لہرانے کے کھمبے اور کئی مقامات پر بجلی کھمبے اور درخت زمین بوس ہوگئے۔ ٹریفک بیریکیڈس الٹ پلٹ گئے۔ فلیکس بورڈس زمین پر آ گرے۔ اسمارٹ سٹی کا تعمیری کام جاری رہنے کی وجہ سے گڈھوں میں پانی جمع ہوگیا۔ نالوں میں کچرا اور مٹی جمع ہونے کی وجہ سے ہر جگہ برسات کا پانی سڑکوں پر بہتا نظر آیا۔ جس سے پورے شہر میں موٹر گاڑیوں کی آمد و رفت میں بری طرح خلل واقع ہوگیا۔ بونڈیل، کاوور، ماراکاڈا وغیرہ میں چھوٹی موٹی دکانوں کو نقصان پہنچنے کی اطلاع ملی ہے۔
تیز ہواوں کی وجہ سے منگلورو کی پرانی بندرگاہ پر لنگر انداز کئی ماہی گیر کشتیوں کی رسیاں ٹوٹ گئیں اور وہ اپنے مقام سے ہٹ کر کہیں اور تیرتی ہوئی نظر آئیں۔ کچھ کشتیاں بندرگاہ سے نکل پانمبور، میناکالیا، چتراپور، سورتکل، سسی ہیتلو جیسے ساحلی علاقوں تک پہنچ گئیں۔ بہت ساری کشتیوں کو نقصان ہونے کی بھی خبر ہے۔
سوُلیا سے ملی خبر کے مطابق بھاری برسات کے دوران بجلی کی سپلائی منقطع ہوگئی جس سے پورے سولیا تعلقہ میں اندھیرا چھا گیا۔ جبکہ بنٹوال میں بارش کا پانی بعض دکانوں کے اندر گھس گیا۔
ادھر ضلع شمالی کینرا کے بھٹکل شہر میں بھی کئی مقامات پر ناقابل برداشت گرمی کے دوران اچانک ہلکی پھلکی بوندا باندی ہوئی جس سے تھوڑی دیر کے لئے راحت محسوس کی گئی۔ آج صبح سے یہاں کا موسم کچھ ابرآلود سا ہے، اور شام تک برسات ہونے کے امکانات دکھائی دے رہے ہیں، کیونکہ ضلع کے دوسرے مقامات پر دو دن سے وقفہ وقفہ سے برسات ہونے کی خبریں مل رہی ہیں۔
محکمہ موسمیات نے بھی آئندہ 24 گھنٹوں کے دوران ساحلی علاقے اور اندرونی کرناٹکا میں طوفانی برسات ہونے کی پیش گوئی کی ہے۔