بھٹکل22؍نومبر (ایس او نیوز) محکمہ موسمیات  نے پیشین گوئی کی ہے کہ شمالی کینرا، جنوبی کینرا اور اڈپی سمیت ریاست کے کئی اضلاع میں 24 نومبر تک بھاری برسات ہو سکتی ہے۔
    
بھٹکل سمیت ساحلی علاقے کے کئی مقامات پر آج منگل صبح سے ہی بادل چھائے ہیں اور ایک آدھ مرتبہ ہلکی پھلکی بارش بھی ہوئی ہے ۔ جبکہ بنگلورو میں بالکل کہرا سا چھایا رہا اور پہاڑی علاقے کا سماں بن گیا ۔ کل بنگلورو کا کم سے کم درجہ حرارت 13.9 ڈگری سیلسیس تھا جو کہ گزشتہ دس سال میں نومبر کے مہینے میں درج کیا گیا سب سے کم درجہ تھا ۔ اس وقت بنگلورو سمیت ریاست کے بہت سارے حصوں میں سخت سردی کا موسم شروع ہوگیا ہے اور اب بھاری برسات کے امکانات کو دیکھتے ہوئے عوام فکرمند ہوگئے ہیں۔
    
محکمہ موسمیات کی پیشین گوئی کے مطابق ساحلی علاقے کے علاوہ ٹمکورو، میسورو، رام نگر وجیاپور اور ہاویری وغیرہ میں بھی برسات کے امکانات ہیں۔