کرناٹک کے مختلف اضلاع میں موسلادھار بارش ؛کے آر ایس ڈیم فُل : ایک ہلاک، چار ماہی گیر زخمی
بنگلورو:17؍اکتوبر(ایس اؤ نیوز)ریاست کے ساحلی ، ملناڈ اور شمالی کرناٹکا کے کچھ مقامات پر بدھ کو بہتر بارش ہوئی ہے۔ بلاری ضلع کے ھوین ہڈگلی میں بجلی گرنے سے ایک شخص ہلاک ہواہے۔ کاروار کے سمندر میں مچھلی شکار کے لئے گئے ماہی گیروں کی کشتی پر بجلی گرنے سے 4 زخمی ہوئےہیں۔
کورگ ضلع میں موسلادھار بارش کی وجہ سے کے آر ایس ڈیم کے اندرونی بہاؤ میں اضافہ ہونے کی وجہ سے ڈیم بھر گیا جس کی وجہ سے ڈیم کے باہری بہاؤ میں 25959کیوسک کا اضافہ کیاگیاہے۔ ڈیم میں پانی ذخیرے کی سطح 124.80 فٹ ہے۔ بدھ کی شام تک ڈیم میں 23105کیوسک پانی ڈیم میں جمع ہوگیا تھا۔ کاویری آب پاشی نگم نے ندی کناروں کے مکینوں کو چوکنا کیا ہے۔
اُدھر اُڈپی میں موسلادھار بارش کے دوران بیرم پلّی گرام پنچایت حدود کےدوپٹکٹے میں ایک سڑک بارش کے پانی کے ساتھ بہہ گئی اور ایک جگہ سے دوسری جگہ کا سڑک کا رابطہ کٹ گیا۔ اُڈپی میں بھی گذشتہ تین چار دنوں سے بجلی گرنے کے ساتھ کچھ گھنٹوں کے لئے موسلادھار بارش ہورہی ہے
کے آر پیٹے تعلقہ میں موسلادھار بارش ہونے کی وجہ سے سندھو گھٹ دیہات کے تالاب ٹوٹ جانے سے پانی کھیتوں میں گھس گیا ہے جس کےنتیجےمیں سیکڑوں ایکڑ زمین کی دھان، موز ، گنے کی فضل برباد ہوگئی ہے۔ اگرہار باچے ہلی دیہات کاتالاب بھی ٹوٹ جانے سے برج زیر آب ہوگیا ہے۔ میسور شہر اور سکلیشپور میں منگل کی رات زوروں کی بارش ہوئی ہے۔
اترکنڑا ضلع کے مختلف مقامات پر بھی منگل اور بدھ سمیت جمعرات کو گرج اور بجلی سمیت بارش ہوئی ہے۔ سداپور، گوکرن ، جوئیڈا، منڈگوڈ، بھٹکل وغیرہ میں بھی بارش ہوئی ہے۔منگلورو شہر سمیت دکشن کنڑا ضلع بھر میں دوپہر ڈیڑھ گھنٹہ لگاتار بارش برسی ہے، بنٹوال، بیلتھنگڈی تعلقہ جات میں گرج اور بجلی زوروں پر تھی ۔ بنٹوال تعلقہ میں 4سنٹی میٹراور بیلتھنگڈی تعلقہ میں 2.8سنٹی میٹر بارش درج کی گئی ہے۔
اُڈپی ضلع کے برہماور کے نواحی علاقے چیرکاڑی ، پیتری ، آرورو کرجے اور چک منگلورو ضؒع کے کلس ، کوپا ، موڈگیری میں بھی بارش ہوئی ہے۔ شیموگہ شہر کے اطراف تیرتھ ہلی، کونم دور، سورب وغیرہ میں بھی گرج، بجلی کے ساتھ بارش ہوئی ہے۔ ساگر ، شکاری پور ، ہوسنگر میں سیاہ بادل چھائے ہوئے ہیں۔ چتردرگہ ضلع کے بھی کچھ مقامات پر اچھی بار ش ہوئی ہے۔ چک جاجور میں بہتر بارش برسی ہے۔
