غیر متوقع بارش سے چکبالاپورمیں 419کروڑ روپے کا نقصان
چکبالاپور ،25؍نومبر (ایس او نیوز) ضلع میں پچھلے دنوں ہوئی بارش سے ابتدائی رپورٹ کے مطابق 419 کروڑ روپئے کا نقصان ہونے کا اندازہ لگایا گیا ہے۔ اس لئے ضروری ہے کہ راحت کاری کے کاموں میں کسی بھی طرح کی کاہلی برتنی نہیں چاہئے۔ افسروں کو چاہئے کہ وہ اس پر بڑی توجہ اور ذمہ داری کے ساتھ کام انجام دینے کی کوشش کریں۔ یہ ہدایت ڈپٹی کمشنر آر لتا نے یہاں کے ضلع پنچایت ہال میں منعقد کئے گئے ایک اجلاس میں افسروں کو دیتے ہوئے کہا کہ یکم اکتوبر سے 22 نومبر کے دوران زیادہ بارش سے ہوئے ان نقصانات کا مکمل طور پر جائزہ لیا جانا چاہئے۔ اس ماہ کی 30 تاریخ تک مکمل اور جامع رپورٹ پیش کر دینی چاہئے۔
انہوں نے بتایا کہ ضلع میں جو بارش اس وقفہ میں ریکارڈ کی گئی ہے اس سے پہلے کبھی بھی ایسی بارش نہیں ہوئی تھی۔ اس بارش سے 50 فیصد زراعتی وباغبانی فصلوں کو نقصان پہنچا ہے۔ 1250 گھر، 490 اسکولوں کے 950 کمرے، 449 آنگن واڑی مراکز، 448 بجلی کے کھمبے،41 ٹرانسفارمر،300 کلومیٹر راستے،13 پل، 22عوامی عمارتیں، 2 انسانی جانیں،5گائے،52 بھیڑ بکریوں کا نقصان ہوا ہے۔
انہوں نے ہدایت دی کہ ضلع سطح کے افسروں کو چاہئے کہ وہ سبھی اپنے اپنے کام کاج فوری طور پر مکمل کریں۔ حکومت نے جو گھروں کو نقصان پہنچنے کی وجہ سے معاوضہ دینے کیلئے ہدایت جاری کی ہے اس کے تحت ہی گھروں کی تعمیر کیلئے فوری طور پر امداد جاری کرنے کی جانب توجہ دیں۔ ضلع بھر میں راحت کاری کے کام انجام دینے کیلئے رقم کی کوئی کمی نہیں ہے۔ ضلع کے ہر تعلقہ کیلئے ایک ایک نوڈل آفیسر کا تقرر کیا گیا ہے۔ انکی نگرانی میں راحت کاری کے کام تیزی کے ساتھ مکمل کئے جانے چاہئیں۔
اس اجلاس میں ضلع پنچایت سی ای او شیو شنکر، ایس پی متھن کمار، اڈیشنل ڈی سی امبریش، اسسٹنٹ کمشنر رگھونندن، ضلع کے تمام تحصیلدار، محکمہ زراعت کی ڈپٹی ڈائریکٹر روپا، تعلقہ پنچایت ایگزیکٹیو آفیسرس آرآئی سمیت مختلف محکموں کے ضلع و تعلقہ سطح کے افسر موجود رہے۔