بھٹکل11 مئی (ایس او نیوز) چار روز قبل جنوبی بنگال کے سمندر کو ٹکرانے والا آسانی نامی طوفان کا اثر آج بدھ کو بھٹکل سمیت ساحلی کرناٹکا میں دیکھا گیا جہاں صبح سے شام تک موسلادھار بارش سے عام زندگی مفلوج ہوکر رہ گئی۔
میانما ر اور انڈونیشیا سے ہوتے ہوئے آسانی سمندری طوفان پہلے ہندوستان کے جنوبی بنگال پھر اُڑیسہ، انڈومان، نکوبار اور آندھرا ہوتے ہوئے ساحلی کرناٹک تک پہنچتے پہنچتے کمزور پڑ گیا، البتہ طوفان کمزور ہونے کے باوجود بھٹکل میں طوفانی ہوائیں چلیں اورصبح سے ہی زوردار بارش کا سلسلہ چل پڑا۔
موسلادھار بارش کے نتیجے میں کچھ وقت کے لئے ہی صحیح راستوں پرپانی جمع ہوگیا، سڑکوں پر پائے جانے والے گڈھوں پر پانی جمع ہوجانے سے بالخصوص بائک سواروں اور اسکوٹر سواروں کو گاڑی چلانے میں دشواری پیش آئی اور شام ہوتے ہوتے، موڈ بھٹکل بائی پاس نیشنل ہائی وے پر اسی طرح کے سڑک پر پائے جانے والے گڈھے میں اسکوٹر کا پہیہ گرنے سے حادثہ بھی پیش آیا جس میں ایک شخص کی موت واقع ہوئی۔ بتاتے چلیں کہ راستوں میں پائے جانے والے گڈھوں میں پانی جمع ہوجانے پر راستوں پر گڈھوں کے موجود ہونے کا پتہ نہیں چلتا، جس کے نتیجے میں حادثات رونما ہوتے ہیں۔
بھٹکل کے ساتھ ساتھ ہوناور، کمٹہ اور دوسری طرف اُڈپی میں بھی موسلادھار بارش ہوئی ہے۔