شیموگہ30/ستمبر (ایس او نیوز)شیموگہ مضافاتی علاقے ہولے ہونور اور اطراف میں طوفانی ہواؤں کے ساتھ بھاری برسات نے زبردست تباہی مچائی ہے، جس میں ایک لڑکی کی موت کے علاوہ سیکڑوں گھروں، ہزاروں درختوں کو نقصان پہنچنے کی خبر ہے۔

 معلوم ہو اہے کہ بھاری برسات کے دوران گھر کی مٹی دیوار گرجانے سے ایک آٹو رکشہ ڈرائیور ایوب خان کی نوجوان بیٹی بی بی خدیجہ (20سال) فوت ہوئی ہے جبکہ سیکڑوں گھروں میں پانی گھسنے سے گھریلو ساز وسامان برباد ہوگئے ہیں۔بہت ساے گھروں کی چھتیں اور کھپریل اڑنے کی بھی اطلاعات ہیں۔ دوسری طرف ہزاروں کی تعداد میں کیلے، سپاری اور ناریل کے درخت زمین بوس ہوگئے ہیں جس سے باغبانوں کو لاکھوں روپے کا خسارہ ہوا ہے۔

برسات کی وجہ سے جانی اور مالی نقصانات کی خبر ملنے پر اس حلقے کے رکن اسمبلی کے بی اشوک نائک نے علاقے کا دورہ کیا اور نقصانات کا جائزہ لینے کے بعد تمام ممکنہ سرکاری امداد فراہم کرنے کا یقین دلایا۔تعلقہ انتظامیہ کی جانب سے بارش سے متاثرہ افراد کو اسکول میں پناہ دی گئی ہے اور ان کے قیام و طعام کا انتظام کیا گیا ہے۔

ضلع ڈپٹی کمشنر شیوکمارنے بھی متاثرہ علاقے کا دورہ کرنے کے بعد کہا کہ ”سرکاری افسران کے ذریعے نقصانات کا جائزہ لینے کے بعد ہر طرح کی سرکاری امداد فراہم کرنے کا وعدہ کیا ہے۔فی الحال عبوری طور پر راحت رسانی کا انتظام کیا گیا ہے۔“اپنے دورے کے موقع پرڈی سی نے ریلیف کیمپ پہنچ کر وہاں فراہم کیے جارہے کھا نے کی جانچ کرنے کے لئے خودبھی متاثرین کے ساتھ کھاناکھایا۔اور متعلقہ افسران کو ہدایات جاری کیں کہ متاثرین کو ہر طرح کی راحت فراہم کی جائے اور کسی بھی قسم کی کوتاہی نہ کی جائے۔

 اس موقع پر بھدراوتی تحصیلدار سوم شیکھر، تعلقہ پنچایت سی ای او تمنّا گوڈا، ریوینیو انسپکٹر ستیہ نارائن، ولیج اکاونٹنٹ عنایت اور دیگر محکمہ جاتی افسران موجود تھے۔