ریاض، 28؍اپریل (ایس او نیوز؍ایجنسی) سعودی عرب مکہ میں منگل کو طوفانی بارش سے سڑکیں زیرآب آ گئیں اور سڑکوں پر پانی جمع ہونے سے ٹریفک تعطل کا شکار ہوئی۔

ذرائع کے مطابق کل ہونے والی بارش کے پانی میں گاڑیوں کے ڈوبنے اور سڑکوں کے زیر آب آنے کے ویڈیو کلپس سوشل میڈیا پر وائرل ہوءے تھی۔

ویڈیوز میں مقدس شہر کے مرکزی محلوں العتیبیہ اور المعابدۃ کے مناظر دیکھے جا سکتے ہیں، جن میں نظر آ رہا ہے کہ سڑکوں سے گزرنے والی گاڑیوں کی کھڑکیوں تک پانی پہنچ گیا ہے اور کئی گاڑیاں ڈوب گئی ہیں۔ 

مکہ میونسپلٹی اور بلدیاتی کونسلوں کا عملہ نکاسی آب کے لیے متحرک ہے۔ گرد آلود اور تیز ہواؤں کی وجہ سے درخت کے گرنے سے نکاسی آب کا نیٹ ورک متاثر ہوا ہے۔ 

غیر منظم آبادی والے محلوں میں بارش کے پانی کی نکاسی کے لیے ٹینکرز کام کررہے ہیں- سریع الحرکت ٹیمیں بارش کے پانی کی نکاسی کے لیے تیزی سے کام کررہی ہیں-

رپورٹ کے مطابق مکہ میں بارش اور ژالہ باری سے مشکلات کا سامنا ہے۔ بارش سے قبل گرد آلود ہوائیں چل رہی تھیں۔

حائل اور مملکت کے دیگرعلاقوں میں بھی بارش کی اطلاعات ہیں۔

دوسری جانب محکمہ شہری دفاع نے موسمی انتباہ جاری کیا ہے اور لوگوں سے کہا گیا ہے کہ نشیبی علاقوں میں جانے سے گریز کیا جائے۔