کرناٹک کے اضلاع گلبرگہ اور یادگیر میں زبردست بارش، رائچور اور کوپل بھی شدید بارش سے متاثر
گلبرگہ، 10؍ستمبر (ایس او نیوز؍راست ) اضلاع گلبرگہ و یادگیر میں 8ستمبر کو زبردست بارش ہوئی جس کا سلسلہ ڈھائی گھنٹوں تک چلتا رہا۔یادگیر میں اس بارش کے سبب عام زندگی کافی متاثر ہوگئی ہے۔ سرکاری اعداد و شمار کے مطابق یادگیر میں جمعرات کو 28ملی میتر بارش ریاکرڈکی گئی۔ شہر میں جگہ جگہ پانی جمع ہوجانے کے سبب ٹریفک متاثر رہی۔ شوراپور، ہنسگی اور کھیمباو ی میں بھی جمعرات کو زبردست بارش ہوئی۔ وڈگیرہ تعلقہ کے اناسوگرا گاؤں میں پانی سے لبالب بھرے ہوئے نالوں کے بہنے کے سبب عوام کو انتہائی دشواریوں کا سامنا کرنا پڑا۔ جگہ جگہ پانی جمع ہوگیا تھا۔ نیکل وی گاؤں میں پانی نشیبی علاقوں اور گھروں میں جمع ہوگیا تھا۔ بلدال گاؤں کے دیہات مسی بنا ہلی میں بارش کے پانی کی بہتات سے سڑکوں پر بھی پانی بڑی مقدار میں جمع ہوگیا تھا اور جس کے سبب کئی ایک دیہاتوں کے لئے ٹرانسپورٹ کا ربط ٹوٹ گیا تھا۔
کرناٹک کے کئی حصوں میں جمعرات کو ہوئی بارش کے سبب عوامی دشواریوں میں کافی اضافہ ہوگیا ہے۔ گلبرگہ شہر میں متواتر دو دنوں کی بارش کے سبب نشیبی علاقے کافی متاثر ہوئے ہیں۔ جمعرات کے دن واڑی ریلوے جنکشن اور دیگر مقامات پر بھی کافی بارش ریکارڈکی گئی۔ بینی تھورا کے آبی ذخیرہ میں پانی کی سطح خطرہ کے نشان سے ا وپر آجانے کے سبب عہدہ داران نے اس ڈیام سے پانی چھوڑنا شروع کردیا ہے۔
چہارشنبہ کے دن اضلاع بلاری اور بیجاپور میں شدید بارش کے سبب کئی ایک مکانات جزوی طور پر تباہ ہوگئے۔ 8افرادجو ویدھا وتی کے سیلابی پانی میں گھر گئے تھے انھیں فائیر اینڈ ایمرجنسی سروسس کے اسٹاف نے بچا لیا۔ فائیر اینڈ ایمرجنسی والی اس ٹیم کو اس وقت سخت مشکل اور خطرہ کا سامنا کرنا پڑا جب مذکورہ بالا لوگوں کو کشتی میں سوارکراکر انھیں لے جانے کے وقت کشتی پانی میں ڈوب گئی۔ لیکن بعدمیں انھیں بلاری سے لائی گئی دوسری کشتی میں سوار کرواکر منزل مقصود تک پہنچا دیا گیا۔معلوم ہوا ہے کہ ضلع بلاری میں گزشتہ تین دنوں کی بارش کے سبب 120مکانات جزوی طور پر منہدم ہوگئے ہیں۔ آندھرا پردیش کے بھراونی تپا ڈیام سے 63,000کیوزک پانی چھوڑے جانے کے سبب ویداوتی کے نشیبی علاقوں میں سیلاب جیسی صورت حال پیدا ہوگئی ہے۔سرگپا میں ہاگری ویداوتی برج پانی میں ڈوب چکا ہے جسکے سبب کئی ایک دیہاتوں کے لئے آمد و رفت متاثر ہوگئی ہے۔ ادھونی کا بین الریاستی ہائی وے بھی اس بارش کے سبب متاثرہوکر بند ہوچکا ہے۔ عوام کو اپنی منزل تک پہنچنے کے لئے کو دراہال گاؤں کاطویل سفرکرنا پڑ رہا ہے،۔تالابوں میں پانی کی کثرت اور سڑکوں پر پانی کے زبردست بہاؤ کے سبب طلبا اور اساتذہ اپنے مدارس کو جانے میں دشواری محسوس کررہے ہیں۔ ضلع رائیچور میں مانوی گاؤں کے کئی ایک دیہات بارش سے متاثر ہوگئے ہیں اوسی طرح کوپل میں بھی گزشتہ چار دنوں کی زبردست بارش کے سبب سارے تعلقہ کے راستے اور سڑکیں پانی سے بھر گئی ہیں کئی ایک دیہاتوں کے عوامبڑی مشکلات کے ساتھ پانی کو اپنے گھروں میں سے نکالنے کی کوشش کررہے ہیں۔