کاروار:18؍ستمبر(ایس اؤ نیوز)اترکنڑا ضلع میں موسلادھار بارش اور سیلاب و طغیانی کی وجہ سے سب سے زیادہ سڑکوں کو نقصان پہنچا ہے ۔ عام زندگی معمول پر لوٹ کر ایک ماہ ہونےکو ہے لیکن راستوں کی حالت اب بھی خستہ حال ہے جس سے مسافروں کو کافی پریشانی ہونے کی اطلاعات موصول ہورہی ہیں۔
سرسی، سداپور، یلاپور منڈگوڈ ، جوئیڈا، کاروار، کمٹہ تعلقہ جات قومی شاہراہ اور دیگر اہم سڑکوں کو زیادہ نقصان پہنچاہے۔ گھاٹ کے درمیان سے گزرنے والی شاہراہ پر تو بڑے بڑے گڑھے پڑگئے ہیں سواریوں کا گزرنا محال ہوگیاہے ایک طرح سے ڈرائیوروں کے لئے چیلنج بن گیا ہےتو مسافروں کو مضبوط تھام کر بیٹھنا ہی ایک مسئلہ بن گیا ہے۔
تڑس ۔ کمٹہ کی ریاستی شاہراہ پر دیوی منے گھاٹ، سرسی کے قریب نیلکنی علاقے میں سواریاں نہیں چل رہی ہیں۔ متعلقہ سڑک کو ریاستی شاہراہ میں منتقل کرنےکی وجہ سے کوئی درستی نہیں کرنے کی بات کہی جارہی ہے، البتہ کام تکمیل کو پہنچنے سے پہلے ہی ٹول فیس گیٹ ضرور لگائے گئے ہیں۔ فی الحال کوئی بھی ادھر توجہ دینے کو تیار نہیں ہونے کی بات کار ڈرائیور وینکٹیش نائک نے کہی۔ منڈگوڈ علاقے کی خستہ حال سڑکوں کی مرمت کے لئے سوشیل میڈیا پر مہم جاری ہے۔ متعلقہ عوامی نمائندوں کو ٹیاگ بھی کیاگیا ہے مگر نہ کوئی سن رہاہے نہ دیکھنے کو تیار ہے۔