منگلورو27/جولائی (ایس او نیوز) پچھلے کچھ دنوں سے ساحلی علاقے میں ہونے والی مسلسل بارش کی وجہ سے عوامی زندگی بری طرح متاثر ہوگئی تھی۔ پھر ایک دن  کے مختصر وقفے کے لئے بارش میں کچھ کمی آئی تو عوام ابھی راحت کی سانس لینے بھی نہ پائے تھے کہ جمعہ کے دن صبح ہی سے موسلادھار برسات کا سلسلہ پھر سے شروع ہوگیا۔

 برسات اتنی تیز تھی کہ کچھ ہی دیر میں شہر کے کئی نشیبی علاقے پانی میں ڈوب گئے اور مختلف مقامات پر سیلاب جیسی کیفیت پیدا ہوگئی۔سب سے زیادہ متاثر ہونے والے والا علاقے سینٹرل ریلوے اسٹیشن کا تھا جہاں گھٹنوں تک پانی جمع ہونے سے ایسا لگ رہا تھا کہ ریلوے اسٹیشن ایک بڑے تالاب میں کھڑا ہے۔ عوام کے لئے سیلابی صورتحال اورگہرے پانی سے گزر کر ریلوے اسٹیشن تک پہنچنا ممکن نہیں ہورہاتھا۔اڈپی، پتور، کاسرگوڈ وغیرہ سے جو طلبہ ریلوے کے ذریعے منگلورو پہنچے تھے انہیں بڑی مشکل سے گھٹنوں تک بھرے ہوئے پانی سے گزرنا پڑا۔

اس کے علاوہ شہر سے باہر جانے یا بیرون شہر سے آنے والے مسافروں کے لئے بھی انتہائی دشوا ر کن حالات پیش آئے کیونکہ ان کے لئے ریلوے اسٹیشن تک پہنچنا یا وہاں سے نکل کر شہر کی طرف آنا ممکن نہیں ہورہا تھا۔خیال رہے کہ ایک ہفتہ قبل بھی تیز بارش کے دوران منگلورو سینٹرل ریلوے اسٹیشن پر کچھ وقت کے لئے ایسے ہی حالات پیدا ہوگئے تھے۔لیکن پچھلی مرتبہ کی طرح اب کی بار ریلوے اسٹیشن کے اندرونی حصہ اور دفاتر میں پانی نہیں بھرا تھا۔

عوام کا کہنا ہے کہ سینٹرل ریلوے اسٹیشن کے پاس اس طرح پانی جمع ہونے اور سیلاب جیسی صورتحال پیدا ہونے کا سبب ریلوے اسٹیشن کے احاطے میں انڈر گراؤنڈ ڈرینیج کے لئے کھودا گیا نالا ہے جو کھلا پڑا ہے۔

 جمعہ کے دن منگلورو اور بیلتنگڈی میں 55ملی میٹر بارش ریکارڈ کی گئی جبکہ جنوبی کینرا ضلع میں مجموعی طور پر37ایم ایم بارش ہوئی تھی۔گزشتہ جولائی کے مہینے میں 26تاریخ تک ضلع میں اوسطاً 849ایم ایم بارش ہوئی تھی جبکہ امسال اسی عرصے میں 1,217ایم ایم بارش ریکارڈ کی گئی ہے۔