بھٹکل کےقریب آننت واڑی میں دل کو دہلادینے والا حادثہ؛ ٹمپو سے ٹکر لگتے ہی بائک دھماکے کے ساتھ پھٹ پڑی؛ تین کی موقع پر موت
بھٹکل 14/اگست (ایس او نیوز) یہاں سے قریب 30 کلو میٹر دور آننت واڑی نیشنل ہائی وے پر ہوئے ایک دل کو دہلا دینے والے سڑک حادثے میں تین لوگوں کی اُس وقت موت واقع ہوگئی جب ان کی بائک ایک ٹمپو سے ٹکراتے ہی دھماکے کے ساتھ پھٹ پڑی۔ حادثہ ہوناور تعلقہ کے منکی پولس تھانہ حدود میں منگل شام قریب چار بجے پیش آیا۔
اطلاع کے مطابق بائک پر سوار ایک مرد، ایک خاتون اور ایک بچہ تینوں کی موت واقع ہوگئی، جن کی شناخت ابھیشیک وویویک نائک (22)، سنگیتا تمپا گوڈا (16) اور سندیپ تمپا گوڈا (12) کی حیثیت سے کی گئی ہے۔
پولس نے بتایا کہ سنگیتا اور سندیپ بھائی بہن ہیں، جن کا تعلق آننت واڑی سے ہے، البتہ ابھیشک کا تعلق کمٹہ سے ہے۔ پولس کے مطابق ابھیشک اور سنگیتا قریبی رشتہ دار تھے۔
بتایا گیا ہے کہ تینوں لوگ مرڈیشور سے منکی کی طرف جارہے تھے کہ آننت واڑی نیشنل ہائی وے 66 پر ان کی بائک ایک ٹمپو سے ٹکراگئی۔ ٹکر اتنی شدید تھی کہ ٹمپو سے ٹکراتے ہی بائک کی پٹرول ٹنکی دھماکے کے ساتھ پھٹ گئی اور پوری بائک آگ کی لپیٹ میں آگئی، جس کے نتیجے میں تینوں کو سنبھلنے کا موقع ہی نہیں مل سکا اور وہ وہیں ہلاک ہوگئے۔
مسافروں سے بھری ٹمپو ہوناور سے بھٹکل جارہی تھی۔بائک اور ٹمپو کی آمنے سامنے ٹکر ہوئی۔
حادثہ کے بعد سڑک پر دل کو دہلا دینے والا منظر تھا، بائک روڈ کے کنارے پڑی جل رہی تھی اور تینوں لاشیں سڑک پر بکھری پڑی تھی۔
حادثے کی اطلاع ملتے ہی منکی پولس جائے وقوع پر پہنچی اورضروری کاروائیوں کے بعد تینوں لاشوں کو پوسٹ مارٹم کے لئے منکی اسپتال پہنچایا۔
پولس نے ٹمپو کو اپنی تحویل میں لینے کے ساتھ ساتھ ٹمپو ڈرائیور کو گرفتار کرلیا ہے، ہوناور سرکل پولس انسپکٹر چلوراج کی قیادت میں منکی پی ایس آئی میتھو گوڈا معاملے کی جانچ کررہی ہیں۔
