اس موسم میں سردی و بخار عام ہے، گھبرانے کی ضرورت نہیں، 25؍ جنوری تک کورونا معاملوں میں اضافہ ہوسکتا ہے: وزیر صحت کے سدھاکر
بنگلورو، 19؍ جنوری (ایس او نیوز) کرناٹک میں جنوری کی آخر تک کورونا معاملوں میں سب سے زیادہ اضافہ ہونے کے خدشات کے درمیان منگل کو کورونا متاثرین کی تعداد میں معمولی کمی دیکھی گئی۔ ریاست میں کورونا ٹیسٹنگ بڑھائے جانے کے باوجود منگل کو 27 ہزار 156 معاملے سامنے آئے۔ یومیہ مثبت شر میں پیر کو 19.29 فیصد کے تاسب میں منگل کو 12.45 فیصد تک کی گراوٹ آئی ۔ اس درمیان تکنیکی مشیر کمیٹی نے انداز لگایا ہے کہ 25 ؍ جنوری تک معاملوں میں سب سے زیادہ اضافہ ہوسکتا ہے۔ ڈاکٹروں نے لوگوں کو جمعہ تک احتیاط برتنے کی صلاح دی ہے اور کہا ہے کہ بنگلورو میں دو دنوں کے لئے کورونا معاملوں میں کمی رہی تو دیگر اضلاع میں بھی اس کی توسیع کی جائے گی۔
وزیر اعلیٰ بسواراج بومئی نے پیر کو ہفتہ وار کرفیو پر تفصیلی بات چیت کے لئے طبی افسران، ٹی اے سی ارکان اور متعلقہ وزرا کی میٹنگ طلب کی تھی۔ وزیر محصولات آر اشوک نے عندیہ دیا کہ اگر کورونا کے معاملے کم ہوتے ہیں اورپازیٹیوٹی کی شرح آئندہ بھی کم ہوتی ہے تو پابندیوں میں کچھ رعایت دی جاسکتی ہے۔ انہوں نے کورونا معاملوں میں تعداد میں گراوٹ آنے کا امکان ظاہر کیا۔ فی الحال انہوں نے لاک ڈاؤن لگانے سے انکار کردیا۔ لیکن کووڈ پروٹوکال پر سختی سے عمل کرنے کی ہدایت دی۔
وزیر صحت کے سدھا کر نے کہا کہ دسمبر سے فروری تک فلو کا موسم سمجھا جاتا ہے اس لئے سردی و بخار رہنا عام بات ہے اس سے لوگوں کو گھبرانا نہیں چاہئے۔ انہو ں نے کورونا کے بڑھتے انفیکشن کو روکنے کے لئے سخت اقدامات کی بھی ہدایت دی
