بنگلورو،26؍ دسمبر(ایس او نیوز) جے ڈی ایس کے ترجمان رمیش بابو نے بی جے پی کے سینئر سیاستدان وریاست کے سابق وزیر اعلیٰ ومرکزی وزیر وگورنر کے عہدہ پر رہ چکے ایس ایم کرشنا کی سوانح حیات کتاب پر تبصرہ کرتے ہوئے کہا کہ جب کوئی اپنی آپ پیشی لکھے تو عوام کے لئے رہنمائی کرنے والی کتاب اور ان میں جذبہ وجوش پیدا کرنے والی سوانح حیات ہو، کئی ایک سچائیوں کو چھپانے کی کوشش نہیں ہونی چاہئے۔ بی جے پی کے لیڈر ایس ایم کرشنا سے لئے گئے انٹرویوز پر مبنی کتاب ’اسمروتی واہنی‘ میں جے ڈی ایس کے قومی صدر ایچ ڈی دیوے گوڈا کے تعلق سے جو بتایا گیا ہے، اس نکتہ کو سامنے رکھ کر رمیش بابو نے یہ تبصرہ کیا ہے۔ رمیش بابو نے کہا کہ کوئی سوانح حیات لکھی جائے تو وہ نئی نسل کے لئے رہنما ثابت ہو، نہ کہ سچائیوں کو چھپانے والی کوئی کتاب، اس کتاب میں ایس ایم کرشنا اور دیوے گوڈا کی ملاقات کو ایک خبر کے طو ر پر پیش کیا گیا ہے۔ جب ایس ایم کرشنا ریاست کے وزیر اعلیٰ کے عہدے پر تھے تو 2004 میں کانگریس پارٹی کو کرناٹک میں شکست سے دوچار ہونا پڑا تھا، اس وقت جے ڈی ایس کی تائید سے وزیر اعلیٰ بننے کے لئے ایس ایم کرشنا دیوے گوڈا کے گھرکے سامنے کھڑے تھے اور اس سچائی کو اس سوانح حیات میں شامل نہیں کیا گیا ہے۔ رمیش بابو نے اس سلسلہ میں ایک ٹوئٹ کے ذریعہ یہ انکشاف کیا ہے۔ ایس ایم کرشنا نے اپنی کتاب میں دیوے گوڈا کے کانگریس میں شامل ہونے کی بات لکھی ہے، ایک اور ٹوئٹ میں انہو ں نے کہا ہے کہ اس ملک میں آزادی کے لئے تحریک چلانے والی کانگریس پارٹی ملک میں وجود میں آنے والی کئی ایک سیاسی پارٹیوں کے لئے بنیاد بنی ہے۔ایس ایم کرشنا پہلے بی ایس پی پارٹی سے جڑے ہوئے تھے۔ وہ بنیادی کانگریس لیڈر نہیں تھے۔ ایس ایم کرشنا کی سوانح حیات پر مبنی لکھی گئی کتاب میں یہ بات درج کی گئی ہے کہ 1980/ کی دہائی میں ایچ ڈی دیوے گوڈا اور ایس آر بومئی نے کانگریس میں شامل ہونے کی خواہش ظاہر کی تھی، آٹو رکشا میں میرے گھر آنے والے دیوے گوڈا نے ان سے کہا تھا کہ اپوزیشن پارٹیوں میں اتحاد نہیں ہے۔ ایک اصول نہیں؟ اسی لئے میں نے ذہن بنالیاہے کہ کانگریس میں شامل ہوجاؤں۔ ایک نکتہ پر تبصرہ کرتے ہوئے رمیش بابو نے ٹوئٹ کیا ہے۔