بنگلورو،21؍جون(ایس او نیوز) ٹیکس معاملے میں ملوث وزیرڈی کے شیو کمار کی ماں کو ہائی کورٹ کی طرف سے راحت ملی ہے۔ محکمہ ٹیکس کی بے نامی جائیدادکے سیل نے ڈی کے شیو کمار کی ماں گورما کو نوٹس جاری کیا تھا۔ ہائی کورٹ نے اس نوٹس پر روک لگانے کی ہدایت دیتے ہوئے گورما کے خلاف اگلی کارروائیوں پر بھی روک لگائی ہے۔ ٹیکس کی ادائیگی کے سلسلہ میں 21مارچ کو نوٹس جاری کرکے 90دنوں کے اندر جواب مانگا گیا تھا۔ اس نوٹس کے تحت اس ماہ کی 22تاریخ کو تفصیلات پیش کرنی تھی۔ مذکورہ نوٹس پرروک لگانے کیلئے گورما نے ہائی کورٹ میں عرضی داخل کی تھی گورما کی عرضی سماعت کے دوران ہائی کورٹ نے یہ ہدایت جاری کی ہے۔ بتایا جاتا ہے کہ گورما اور ان کے افراد خاندان کے پاس بے حساب زمینات اور زراعت سے حاصل رقم ہے۔ اس کے علاوہ یہ بھی پتہ لگاہے کہ 2016ء میں انہوں نے بے نامی زمین کی دستاویزات میں ردو بدل کی تھی جس کے خلاف شکایات درج کی گئی ہیں۔