پانی پت،22جنوری(آئی این ایس انڈیا)ہریانہ کے وزیر داخلہ انیل وج نے دو ٹوک کہا کہ پولیس محکمہ کی سی آئی ڈی ونگ میں جو افسر یا ملازم کام نہیں کرے گا، اس سے سختی سے نمٹا جائے گا۔ناکارہ افسران اور ملازمین کے خلاف کارروائی کرنا وزیر داخلہ کے طور پر میری مضبوط ذمہ داری ہے۔

وج نے سی آئی ڈی کو لے کر وزیر اعلی منوہر لال سے کوئی بھی تنازعہ نہ ہونے کی بات دہرائی۔ہریانہ کے وزیر صحت انل وج نے منگل کی شام کو پانی پت کی اسکائی لارک کمپلیکس میں کہا کہ افسر اور ملازمین عوام کی خدمت کریں،کام نہ کرنے والے ملازمین سے وہ سختی سے نمٹنا جانتے ہیں،نشے کے سیاہ کاروبار کو وہ بند کراکر ہی  دم لیں گے،منشیات کے غیر قانونی کاروبار کو جڑ سے ختم کرنے اور نشے کی سپلائی روکنے کے لئے نارکوٹکس ونگ بنائی جائے گی۔وزیر  داخلہ اور وزیر صحت وج نے محکمہ صحت میں ڈاکٹروں اور محکمہ پولیس میں حکام اور ملازمین کے ڈیوٹی سے ندارد رہنے کے سوال پر کہا کہ صحت کی خدمات کو مسلسل بہتر کیا جا رہا ہے۔صحت اور محکمہ پولیس میں موومنٹ رجسٹر لگائے گئے ہیں، تاکہ پولیس اور محکمہ صحت کے افسران اور ملازمین اگر محکمہ جاتی کام سے نکلے تو موومنٹ رجسٹر میں درج کریں، سب جگہ بایومیٹرک حاضری لگوائی جا رہی ہے۔انہوں نے کہا کہ پھر بھی اگر کوئی کمی کہیں نظر آئی تو اسے ٹھیک کیا جائے گا۔انہوں نے ہریانہ پولیس کی سی آئی ڈی ونگ سمیت دیگر سوالات کے جواب میں کہا کہ ان کا وزیر اعلی منوہر لال کے ساتھ کوئی تنازعہ نہیں ہے۔