بھٹکل 8 نومبر (ایس او نیوز) نئی دہلی میں صدر جمہوریہ رام ناتھ کووند نے آج راشٹرپتی بھون میں منعقدہ ایک شاندار تقریب میں سال 2020 کے لیے اپنے متعلقہ شعبوں میں نمایاں خدمات انجام دینے والی شخصیات کو پدم شری ایوارڈ سے نوازا جس میں ریاست کرناٹک کے ساحلی شہر منگلور کے ہاریکل ہاجبّا بھی شامل ہیں۔
مینگلور کے سنترہ فروش ہاجبّا کو تعلیم کے میدان میں انقلاب برپا کرنے پر اس ایوارڈ سے نوازا گیا ہے جنہوں نے اپنے گاوں ہاریکل میں سنترہ فروشی کے باوجود اپنی جمع پونجی کو تعلیم کے میدان میں خرچ کیا تھا اور اپنی جمع پونجی سے اپنے گاوں میں تعلیم سےمحروم بچوں کے لئے ایک پرائمری اسکول تعمیر کیا تھا۔
خود غیر تعلیم یافتہ ہوتے ہوئے دوسروں کو تعلیم کے میدان میں آگے بڑھانے کا جذبہ لے کر اپنی کم آمدنی کے باوجود تھوڑی تھوڑی رقم بچا کر اسکول تعمیر کرنے اور اپنے گاوں کے نونہالوں کو تعلیم کے زیور سے آراستہ کرنے کی ان کی کوششوں کو سراہتے ہوئے گذشتہ سال یعنی 25 جنوری 2020 کو ہی انہیں پدم شری ایوارڈ دینے کا اعلان کیا گیا تھا، مگر کووڈ کے چلتے تقریب منعقد نہیں ہوسکی تھی۔ آج پیر کو نئی دہلی کے راشٹرپتی بھون میں اس تعلق سے ایک عالیشان تقریب منعقد کرتے ہوئے اُنہیں اس عظیم اعزازسے نوازا گیا۔ پدم شری بھارت کا چوتھا بڑا شہری اعزاز ہے۔جو ملک کے شہریوں کو اُن کی عظیم خدمات کے اعتراف میں دیا جاتا ہے۔
نئی دہلی میں منعقدہ ایوارڈ تقریب میں وزیر اعظم نریندر مودی، مرکزی وزیر داخلہ امت شاہ اور وزیر خارجہ ایس جے شنکر سمیت متعدد دیگر معززین بھی موجود تھے۔ صدر جمہوریہ نے سینئر سوشلسٹ لیڈر اور سابق وزیر دفاع جارج فرنانڈیز، سابق وزیر خزانہ ارون جیٹلی اور سابق وزیر خارجہ سشما سوراج کو بھی بعد از مرگ ملک کا دوسرا سب سے بڑا شہری اعزاز پدم وبھوشن سے نوازا۔ماریشس کے سابق صدر جمہوریہ اور وزیر اعظم انیرودھ جگناوتھ کو بھی پدم وبھوشن سے نوازا گیا۔کلاسیکی گلوکار چننولال مشرا، باکسر میری کوم اور پجاور مٹھ کے سابق سربراہ آنجہانی وشویش تیرتھ سوامی کو بھی پدم و بھوشن سے نوازا گیا۔
صدر جمہوریہ نے سال 2021 کے لیے بھی 119 شخصیات کو پدم ایوارڈ سے نوازا جن میں سات پدم وبھوشن، 10 پدم بھوشن اور 102 پدم شری ایوارڈ شامل ہیں۔