شوہر کے ظلم سے تنگ آکر خاتون نے دو جوان بیٹیوں کے ساتھ کرلی خودکشی؛ بنگلور میں پیش آئی اندوہناک واردات
بنگلور13/اگست (ایس او نیوز) بنگلور شہر کے سری نگر بس اسٹائنڈکے قریب ایک خاتون نے اپنے شوہر کے ظلم سے تنگ آکر اپنی دو جوان بیٹیوں کے ساتھ خودکشی کرلی، یہ اندوہناک واردات پیر کو منظر عام پر آئی ہے۔
میڈیا رپورٹ کے مطابق خودکشی کرنے والوں کی شناخت راجیشوری (43) ان کی دو بیٹیاں مانسا (17) اور بھومیکا (15) کی حیثیت سے کی گئی ہے۔ یہ لوگ بنگلور سری نگر کے کالپّا ایکسٹنشن میں رہائش پذیر تھے۔ بتایا گیا ہے کہ راجیشوری کا تعلق ضلع منڈیا سے تھا اوروہ گھریلو خاتون تھی جبکہ اس کا شوہر سِدّیا کرناٹکا الیکٹری سٹی بورڈ میں سیکورٹی گارڈ کی حیثیت سے ملازمت کرتا تھا۔ چھوٹا سا یہ خاندان کئی سالوں سے بنگلور میں تھا۔
مانسا مقامی کالج میں پی یوسی اول اور بھومیکا ایس ایس ایل سی کی طالبہ تھی۔
بتایا گیا ہے کہ میاں بیوی میں کسی گھریلو معاملے کو لے کر اکثر جھگڑے ہوتے رہتے تھے۔ بتایا گیا ہے کہ اسی طرح کے ایک جھگڑے کے بعد شوہر سِدّیا اپنے آبائی گاوں جانے کے لئے چلا گیا تھا۔ اُس نے اتوار کو بیوی کو فون کیا، مگر اُسے جب کوئی جواب نہیں ملا اور فون کسی نے ریسیو نہیں کیا تو اُس نے شہر میں موجود اپنے رشتہ داروں کو واقعے کی جانکاری دی اور گھر جاکر چیک کرنے کے لئے کہا۔ اُس کے رشتہ دار جب اُس کے گھر پہنچے تو گھر کے دروازے اندر سے بند ملے، انہوں نے کھڑکی کے ذریعے اندر جھانکنے کی کوشش کی تو پتہ چلا کہ تینوں کی لاشیں اوپر چھت سے لٹکی ہوئی ہیں۔ انہوں نے فوری پڑوسیوں کو واقعے کی جانکاری دی اور پولس کو بھی مطلع کیا۔
اطلاع ملتے ہی ہنومنت نگر پولس جائے وقوع پر پہنچی اور معاملے کی چھان بین شروع کی۔
پولس نے مہلوکین کے جب موبائل کی جانچ کی تو راجیشوری اور مانسا کے موبائل میں وہاٹس ایپ اسٹیٹس پر پیغام دیکھا جس میں ان دونوں نے اپنی زندگی ختم کرنے سے پہلے لکھا تھا کہ ان کے ساتھ جو بھی معاملہ پیش آیا ان سب کا اہم ذمہ دار سِدّیا ہے۔ مانسا نے لکھا تھا کہ ہرکوئی چاہتا ہے کہ اُس کو ایک اچھا باپ ملے، مگر ہمارے باپ نے ہی ہماری زندگیوں کو برباد کردیا۔
بتایا گیا ہے کہ 9/اگست کو ہوئے ایک تہوار کے موقع پر بھی سِّدیا اپنی اہلیہ سے ملنے نہیں آیا تھا جبکہ راجیشوری کو خبر ملی تھی کہ اس کا شوہر اپنی کسی کمپنی کی خاتون کے ساتھ ٹور پر گیا ہے۔ اس بات سے راجیشوری کو بہت زیادہ صدمہ پہنچا۔
پولس کو پتہ چلا ہے کہ سِدّیا تمل ناڈو میں کہیں ٹور پر گیا ہے اور پولس اب اس کی تلاش میں جٹ گئی ہے۔