ہانگل : تالاب میں تیرنے گئے تین لڑکے ہلاک
ہانگل:5؍ اپریل(ایس اؤ نیوز)ہانگل تعلقہ اکِّی آلور کے قریب منتگی دیہات کے تالاب میں اتوار کو تیرنے گئے تین لڑکے پانی میں غرق ہوکر ہلاک ہونے کا واقعہ پیش آیاہے۔
مہلوک بچوں کی شناخت منتگی دیہات کے محمد ساحل مقبول صاحب ڈونگری (17)، احمد رضا جعفر صاحب انچی (16)اور اختر رضاخان حضرت خان یلوٹی (16) کی حیثیت سے کی گئی ہے۔
موصولہ اطلاعات کے مطابق چار دوست گاؤں کے تالاب میں تیرنے گئے تھے۔ جن میں سے ایک لڑکا پانی میں نہیں اُترا تھا اس لئے وہ محفوظ رہ گیا۔ مقامی لوگوں نے دیگر تینوں لڑکوں کی نعشوں کو باہر نکالاہے۔
پولس نے جائے وقوع پر پہنچ کر معائنہ کیا ہے۔ ہانگل پولس تھانےمیں کیس درج کرلیاگیا ہے۔