بھٹکل مرکزی خلیفہ جماعت المسلمین کے زیراہتمام جلسہ تربیت حجاج کا انعقاد
بھٹکل:4؍جولائی (ایس اؤ نیوز) حج کو صرف امیر اور پیسہ والے ہی جانا ضروری نہیں ، بلکہ اللہ تعالیٰ جس کو منتخب کرتاہے وہ حج کی سعادت حاصل کرتاہے۔ تاریخ میں ایسے کئی واقعات ملتے ہیں ، کئی دفعہ معمولی ، غریب بھی حج کرتاہے۔ہماری نیت صاف ہو اور ہم اس معاملے میں مخلص ہوں تو اللہ آسان کرتاہے۔ان خیالات کا اظہار مرکزی خلیفہ جماعت المسلمین بھٹکل کے چیف قاضی مولانا خواجہ معین الدین اکرمی ندوی مدنی نےکیا۔
وہ یہاں جماعت کے دفتر میں امسال حج پر جانےو الوں کے لئےمنگل بعد نماز عصر منعقدہ حج تربیتی کیمپ پروگرام میں صدارتی خطاب کررہے تھے ۔ مولانا نےبتایا کہ حج کے لئے جتنی بڑی خطیر رقم خرچ کرتےہیں شاید ہی کسی اور کام کے لئے اتنی زائد رقم خرچ کرتےہونگے۔ اور اس کے لئے پوری زندگی پائی پائی جمع کر رکھتے ہیں اور حج کے لئے جاتے ہیں۔ حج کا سفر میں یا عمل میں کچھ بھی غلطی ہوجاتی ہے تو حج نہیں ہوتا، دوبارہ حج کرنا پڑتا ہے۔ اگر نقص رہ جاتاہے تو اس کے لئے جانور کی قربانی دینی پڑتی ہے۔ ان سب باتوں کا خیال رکھتےہوئے حج کی تیاری کرنی ہے۔ حج میں صبر بہت ضروری ہے ، یہ سفر صبر کا تقاضا کرتاہے۔ اس کے علاوہ مولانا نے حج کے ارکان، طواف، احرام، مدینہ کا سفر، مکہ کا سفر ، قربانی ، سعی وغیرہ کے متعلق تفصیل سے بتایا۔
جلسہ کا آغاز حسن ابن عبدالعظیم ڈی ایف کی تلاوت قرآن سے ہوا۔ حسن ابن عبدالقیوم سدی باپا نے ہدیہ نعت پیش کی ۔ مولوی محمد ہارون کنڈلوری ندوی نے کلمات استقبالیہ پیش کئے تو مولوی فرقان صدیقہ ندوی نے سفر کے حج کے آداب پراور مولانا سمعان خلیفہ ندوی نے زیارت مدینہ کے متعلق تفصیلات بتائیں۔ مولوی میران ارشاد نائطے ندوی نے شکریہ اداکیاتومحمد طلحہ سدی باپا نے نظامت کے فرائض انجام دئیے۔ ڈائس پر جماعت کے صدر محمد جعفر محتشم ، جنرل سکریٹری محمد میراں سعدا موجود تھے۔