کرناٹک کے مختلف اضلاع میں کرونا کے مریضوں میں مسلسل اضافہ۔ 6سال سے کم عمر والے 12 بچے بھی متاثر
بھٹکل 17؍جنوری(ایس او نیوز) کرونا کی تیسری لہر کے دوران ریاست کرناٹک کے مختلف اضلاع میں کرونا کے مریضوں ں میں مسلسل اضافہ دیکھا جا رہا ہے۔ ایک طرف اتر کنڑا میں کرونا مریضوں کی تعداد اتوار کو ایک ہی دن تین سو کو پار کر گئی تو گلبرگہ میں 6سال اور اس سے کم عمر کے 12بچے بھی کرونا سے متاثر پائے گئے ہیں۔
گلبرگہ ضلعی محکمہ صحت کے پریس نوٹ کے بموجب جمعرات تک ضلع گلبرگہ میں جملہ 958افراد کرونا سے متاثر پائے گئے ان میں 556مرد اور 392خواتین شامل ہیں۔ کرونا کے جملہ متاثرین میں سے 132مریض ایسے ہیں جن کی عمر 18سال سے کم ہے اور 82مریض ایسے ہیں جن کی عمر 60 برس سے زیادہ ہے۔ ان جملہ متاثرین میں سے 646کرونا مریضوں کا تعلق گلبرگہ شہر ہی سے ہے۔
ضلعی ہیلتھ بلیٹن میں عوام سے اپیل کی گئی ہے کہ وہ کرونا سے محفوظ رہنے کے لئے تمام احتیاطی تدابیر اختیار کریں۔ جمعہ کے دن ضلع گلبرگہ میں کرونا کے مزید 338مریضوں کا پتہ چلا ہے۔ اس طرح کرونا کے نئے متاثرین کی تعداد جمعہ تک 1226تک پہنچ گئی تھی۔