احمد آباد، 23 جولائی(ایس او نیوز/آئی این ایس انڈیا) گجرات کے باردولی میں بلیک میلنگ کا حیران کرنے والا معاملہ سامنے آیا ہے،جہاں ایک خاتون نے ٹی وی شو دیکھ کر ریاست کے ایک وزیر کو ہی بلیک میل کرنا شروع کر دیا۔خاتون نے وزیر پر اس کی بہن کے ساتھ ریپ کرنے کا الزام لگاتے ہوئے ایک کروڑ سے زیادہ روپے کی مانگ کی تھی لیکن شکایت ملنے کے بعد پولیس نے ملزم خاتون کو گرفتار کر لیا۔ملزم خاتون کی شناخت 46 سالہ پروین بین کے طور پر ہوئی ہے،پکڑے جانے پر خاتون نے پولیس کو بتایا کہ اس کو پیسے کی ضرورت تھی، اس لئے اس نے ٹی وی شو کرائم پٹرول دیکھ وزیر کو بلیک میل کرنے کی سازش رچ ڈالی۔خاتون نے بارڈولی سے رکن اسمبلی اور گجرات کے کابینہ وزیر ایشور سنگھ پرمار کو بلیک میل کرنے کی کوشش کی تھی۔پولیس نے بتایا کہ وزیر کے ایک ملازم کو 28 جون کے دن ایک بندلفافہ ملاتھا،اس لفافے میں ایک خط تھا جس میں وزیر سے 2 کروڑ روپے مانگے گئے تھے،اس خط کے آخر میں درشنا بین لکھا تھا۔اس کے بعد گذشتہ 15 جولائی کو جنتانگر رہائشی سابق شہر بھاجپا چیف سریندر سنگھ پرمار کے گھر کے باہر ایک بند لفافہ برآمد ہوا۔اس لفافے میں ایک خط تھا جس میں وزیر پر کسی خاتون کی طرف سے اس کی بہن کے ساتھ ریپ کرنے کا الزام لگایا گیا تھا اور انہیں ریپ کے نام پر بدنام کرنے کی دھمکی دی گئی تھی۔اس معاملے کو رفع دفع کرنے کے لئے خط لکھنے والے نے 1 کروڑ روپے سے زیادہ مانگے تھے۔خط میں بتایا گیا تھا کہ پیر کی دوپہر 1 سے 2 بجے کے درمیان سربھو میں ہنومان مندر کے پاس ایک شخص موجود رہے گا،اسی کو پیسہ دینا ہے،رقم نہیں ملنے پر وزیر کے خاندان کو زندہ جلانے کی دھمکی دی گئی تھی،اس سلسلے میں پولیس سے شکایت کی گئی۔پولیس نے معاملے کی چھان بین شروع کی۔بی جے پی لیڈر کی رہائش گاہ پر باہر لگے سی سی ٹی وی کیمروں کی فوٹیج پولیس نے کھنگالے تو اس میں ایک خاتون دکھائی دی۔پولیس تیزی سے تفتیش کرتے ہوئے ملزم خاتون تک جا پہنچی۔پولیس نے بارڈولی کے آنند نگر ہی پروین بین کو گرفتار کیا،پکڑے جانے کے بعد اس نے اپنا جرم قبول کر لیا۔