گجرات اسمبلی انتخابات میں سر درد الپیش ٹھاکر بی جے پی میں شامل ہوں گے؟
نئی دہلی،16/جولائی (ایس او نیوز/ آئی این ایس انڈیا) گجرات اسمبلی انتخابات میں بی جے پی کے لیے سردرد بن چکے الپیش ٹھاکربی جے پی میں شامل ہونے جا رہے ہیں۔ٹھاکرسینا اور او بی سی ایکتا منچ کے اجلاس میں سب نے یہ فیصلہ لیا ہے کہ ترقی کے لیے وہ بی جے پی میں شامل ہوں گے۔لوک سبھا انتخابات کے نتائج کے بعد الپیش ٹھاکور نے دعوی کیا تھا کہ ریاست میں کانگریس کے 15 سے زیادہ ممبران اسمبلی پارٹی چھوڑنے والے ہیں۔انہوں نے کہا ہے کہ کانگریس سے ہر کوئی ناراض اور غیر مطمئن ہیں۔اس کے ساتھ ہی انہوں نے کہاکہ دیکھو اور انتظار کرو۔الپیش ٹھاکرنے کہاہے کہ یہ میرا فیصلہ اور ضمیر کی آوازتھی کہ مجھے کانگریس میں نہیں رہناہے۔مجھے اپنے اور غریبوں کے لیے حکومت کی مدد سے کام کرنا ہے۔الپیش نے کہاہے کہ ہمارے لوگ غریب اورپسماندہ ہیں۔ان کوسرکاری مدد کی ضرورت ہے۔میں بھی مایوس ہوں میں ان لوگوں کو وہ سب نہ دے سکا جس کا میرا ارادہ تھا۔میری تنظیم ان کی آواز ہے۔مجھے ایسی جگہ رہنے کی ضرورت نہیں ہے جہاں احترام نہ ملے اور لوگوں کے حقوق کی بات نہ ہو۔گجرات اسمبلی انتخابات سے پہلے بڑے ہی زور شور سے دیگر پسماندہ طبقات (او بی سی) کے لیڈر الپیش ٹھاکور کانگریس میں شامل ہوئے تھے۔2017 اسمبلی انتخابات میں کانگریس کے ٹکٹ پر رادھن پور سیٹ سے منتخب ہوئے تھے۔انہوں نے گزشتہ 10 اپریل کو یہ دعوی کرتے ہوئے پارٹی کے تمام عہدوں سے استعفی دے دیا تھا کہ وہ اور ان کے ٹھاکور کمیونٹی کو کانگریس کی جانب سے توہین اور دھوکہ ملا ہے۔الپیش ٹھاکور کے ساتھ ہی جگنیش میوانی اور ہاردک پٹیل نے مل کر گجرات میں کانگریس کے لئے مضبوط زمین تیار کی تھی۔حالانکہ حکومت بی جے پی کی ہی بنی تھی لیکن کانگریس نے کئی انتخابات کے بعد اس ریاست میں سخت ٹکر دے پائی تھی۔اب الپیش ٹھاکور کے بی جے پی میں چلے جانے سے کانگریس کے لئے بڑا جھٹکا ثابت ہو سکتا ہے۔ یہاں ایک بات اور توجہ دینے والی ہے کہ کانگریس چھوڑنے سے پہلے الپیش ٹھاکور نے کئی بار اس بات کا دعوی کر چکے تھے کہ وہ بی جے پی میں شامل نہیں ہونے جا رہے ہیں۔مارچ 2019 میں انہوں نے کہاکہ وہ اب کانگریس میں ہی ہیں اور آگے بھی رہیں گے۔ الپیش ٹھاکور نے کہا کہ میں اب اپنے لوگوں کے لئے مسلسل لڑتا رہوں گا۔میں کانگریس میں ہی رہوں گا اور کانگریس کو مسلسل حمایت دیتا رہوں گا۔اس کے بعد جب اپریل 2019 میں انہوں نے کانگریس سے استعفیٰ دے دیا تو انہوں نے کہاکہ میں بی جے پی میں نہیں جا رہا ہوں۔میں اور میرے دو ساتھی رکن اسمبلی 5 سال کی اپنی میعادپوری کریں گے الپیش ٹھاکور کے ساتھ ہی 2 اور کانگریس ممبر اسمبلی دھول سنگھ ٹھاکور اور بھرت جی ٹھاکور نے بھی استعفیٰ دیاتھا۔