کولار،28؍جولائی (ایس او نیوز) سابق وزیر جی ٹی دیوے گوڈ ا کسی بھی صورت میں جے ڈی ایس پارٹی نہیں چھوڑیں گے،آج بھی وہ جے ڈی ایس میں ہی ہیں۔حال ہی میں ہوئے ایم ایل سی اورراجیہ سبھا انتخابات میں بھی جے ڈی ایس پارٹی کے امیدوار کے حق میں ہی ووٹ دیاہے،تیسری مرتبہ کمارسوامی کو وزیر اعلیٰ بنانے کیلئے انہوں نے خود اپیل کی ہے،اس کے تحت 2023کے اسمبلی انتخابات میں جے ڈی ایس کو زیادہ سیٹوں پر کامیاب بناکر کمار سوامی کو تیسری مرتبہ وزیراعلیٰ بنانے کیلئے جدوجہد کی جارہی ہے۔یہ بات رکن اسمبلی واکاؤنٹس کمیٹی چیرمین سارامہیش نے کہی۔

انہوں نے یہاں ضلع پنچایت میٹنگ ہال میں منعقدہ اکاؤنٹس کمیٹی کے جائزہ اجلاس میں شرکت کے بعد اخباری نمائندوں سے خطاب کرتے ہوئے کہاکہ اسمبلی اسپیکر کی ہدایت کے مطابق کولار -چکبالاپور دونوں اضلاع کے مختلف محکموں کے اکاؤنٹس کا جائزہ لیاگیاہے،یہ میڈیا میں بیان نہیں کیاجاسکتا۔کانگریس اور بی جے پی کی طرف سے سماویش منعقد کئے جارہے ہیں،ان حالات میں سماویشوں کی کوئی ضرورت ہی نہیں تھی،جی ایس ٹی کی وجہ سے تمام چیزوں کی قیمتیں آسمان چھورہی ہیں،جس سے غریبوں کاجینا مشکل ہوگیاہے۔

سارامہیش نے مزید کہاکہ جے ڈی ایس پارٹی کی طرف سے پنچ رتنامنصوبہ بنایاگیاہے اور اس کے تحت پارٹی لیڈرقریوں میں قیام کرکے عوام کے مسائل جاننے اورحل کرنے کی کوشش کررہے ہیں،مگر کانگریس اور بی جے پی اپنی پارٹی کے لیڈروں کے نام پر جلسے منعقد کررہے ہیں،جس کی فی الحال ریاست میں کوئی ضرورت نہیں تھی۔جی ٹی دیوے گوڈا آئندہ 2023کے انتخابات میں جے ڈی ایس پارٹی ٹکٹ پر ہی انتخاب لڑیں گے۔حال ہی میں ان سے ملاقات کرکے بات چیت کی ہے،کانگریس او ر بی جے پی حکومت سے عوام بیزار ہوچکے ہیں اور عوا م علاقائی پارٹی کو اقتدار پر لانا چاہتے ہیں۔کمار سوامی کو تیسری مرتبہ وزیر اعلیٰ بناناہی پارٹی لیڈروں اور کارکنوں کا اہم مقصد ہے۔سارامہیش نے ایک سوال کے جواب میں کہاکہ ریاست میں وکلیگا طبقے کے لیڈرکمار سوامی ہی ہیں اور تما م طبقات کو ساتھ لے کر چلنے اور ان کا اعتماد حاصل کرنے میں بھی کمارسوامی کامیاب رہے ہیں۔