بنٹوال:14/مئی (ایس او نیوز) کل رات میں مانی کے قریب ایک کار اور ایکٹیوا اسکوٹر کے درمیان تصادم ہوا۔اس کے بعد ایک مشتعل گروہ نے کار پر حملہ کرکے اسے سخت نقصان پہنچایا۔جس کے بعد جب ایک دوسرا گروپ مداخلت کرنے کے لئے آگے بڑھا تو  حادثہ گروہی تصادم میں بدل گیا۔

اطلاع کے مطابق ایکٹیوا اسکوٹر سواردیگر موٹربائکس کے ساتھ پیرنے سے فرنگی پیٹ کی طرف سفرکررہاتھا۔منگلورو بنگلورو ہائی وے پر مانی نامی مقام پر ایک شراب خانہ  کے سامنے سوفٹ کار اسکوٹر سے ٹکرا گئی۔دونوں طرف سے زبانی جھگڑا شروع ہوا جو بعد میں ایک ہی قوم کے دو گروہوں کے درمیان تصادم کی شکل اختیار کر گیا۔بائکس پر سفر کرنے والوں کے بارے میں بتایا جاتا ہے کہ انہوں نے کار پر حملہ کرکے اسے نقصان پہنچایاہے۔اس گروہی جھگڑے میں ایک شخص زخمی ہوگیا جسے پتور کے ایک پرائیویٹ اسپتال میں داخل کیا گیا ہے۔

 وٹلا پولیس نے جائے واردات پر پہنچ کر حالات کو قابو میں کیا، اس تعلق سے پولس نے اب یہاں  سیکیوریٹی سخت کردی ہے۔