ریاض،2؍ جولائی(ایس او نیوز؍ایجنسی)حرمین شریفین کے انتظام و انصرام سے متعلق عمومی صدارت نے اعلان کیا ہے کہ آج جمعہ کے روز سے مسجد حرام عازمین حج کے استقبال کیلئے پوری طرح تیار ہے۔واضح رہے جمعہ کا یہ دن ایام حج کے دوران مسجد حرام میں عازمین حج کے پہنچنے اور موجودگی کے اعتبار سے مصروف ترین دن ہے اور عازمین حج مسجد حرام میں بڑی تعداد میں پہنچ چکے ہیں۔عازمین حج کی بہت بڑی تعداد پہلے ہی مکہ پہنچ چکی تھی۔ تاکہ 8 ذوالحجہ سے مناسک حج کی ادائیگی شروع کر سکے۔

مسجد حرام میں ان عازمین حج کے استقبال اور دیگر انتظامی امور کیلئے 400 خدام کو حرم کے اندر اور باہر مامور کیا گیا ہے۔یہ خدام عازمین کے استقبال کے علاوہ انہیں مطاف اور دوسری مختلف جگہوں کے بارے میں رہنمائی دیں گے۔ نیز عازمین حج کی بیت اللہ شریف میں آمد اور روانگی کے امور کی نگرانی کریں گے۔ اس سلسلے میں بیت اللہ میں تمام تر انتظامات کو پہلے ہی حتمی شکل دی جا چکی تھی۔

ان انتظامات کے تحت چار ہزار ملازم مسجد حرام کی صفائی ستھرائی کے معاملات کو دیکھ رہے ہیِں۔ دن میں دس مرتبہ حرم شریف میں صفائی کا اہتمام کیا جارہا ہے۔ ماحول کو حفظان صحت کے اصولوں کے مطابق صاف رکھنے کیلئے 13000 لیٹر جراثیم کش لوازمہ استعمال کیا جاتا ہے،جبکہ حجاج کو آب زمزم کی سہولت بہم پہنچانے کیلئے 25000 کولر پورے حرم میں رکھے گئے ہیں۔