مرکزسے اشارہ ملتے ہی ریاست میں بھی اسکول شروع کردیں گے، ہرحال میں پرائیویٹ اساتذہ کاتعاون کریں گے:سریش کمار
بنگلور،13؍ستمبر(ایس او نیوز) کوروناوائرس اورلاک ڈاؤن کے نتیجہ میں تنخواہوں کی عدم ادائیگی کی وجہ سے مالیاتی مسائل سے دوچار ریاست کے پرائیویٹ ان ایڈڈاسکولوں کے 3.5لاکھ اساتذہ کومالی تعاون فراہم کرنے حکومت عہدبندہے۔ان اساتذہ کوکسی بھی شکل میں تعاون کیاجائے گا۔یہ تیقن ریاستی وزیربرائے بنیادی وثانوی تعلیم ایس سریش کمارنے دیا۔
بروزجمعہ ودھان سودھا کے بینکویٹ ہال میں ریاستی سطح کے ٹیچرس ڈے اورتفویض ٹیچرایو ارڈکی تقریب میں خطاب کرتے ہوئے سریش کمارنے کہا کہ ابھی ابھی پرائیویٹ اسکولوں کو بچوں کے نئے داخلوں کی گنجائش فراہم کی گئی ہے۔اس کے ساتھ اساتذہ کوکسی بھی شکل میں مالی تعاون پیش کرنے پرغورکیاجارہاہے۔ یہ بات طے ہے کہ نجی اساتذہ کوکسی نہ کسی طرح تعاون دیاجائے گا۔
انہوں نے مزیدکہا کہ طلبہ،والدین اوراساتذہ تمام کے تمام اسکولوں کے آغازکے حوالے سے دلی طورپر تیارہیں،مرکزی حکومت کی جانب سے ہری جھنڈی دکھانے کے بعد ریاستی اسکولوں میں بھی تعلیمی سال شروع کردیاجائے گا۔ سریش کمارنے کہاکہ 34سال کے بعد نئی قومی تعلیمی پالیسی (این ای پی)ترتیب دی گئی ہے۔تمام کوشامل کرتے ہوئے نئی تعلیمی پالیسی بروئے کارلائی جائے گی۔معیاری اورعمدہ تعلیم فراہمی کویقینی بنانے کی ذمہ داری حکومت کے کندھوں پرہے۔اسی کوپیش نظررکھتے ہوئے کام کیاجارہاہے۔گزشتہ سال کئے گئے وعدہ کے مطابق اساددوست تبادلہ کارروائی کی پالیسی جاری کی گئی ہے۔
ریاستی محکمہ تعلیمات عامہ اس طرح کام کرے گا کہ کوئی بھی بچہ تعلیم سے محروم نہ رہے۔اسکولی معیاری تعلیم فراہمی میں ممتاز رہے منتخب اساتذہ میں ٹیچرس ایوارڈتفویض کرنے کے بعدوزیراعلیٰ بی ایس ایڈی یورپانے کہا کہ کوروناوائرس کے بحران کے موقع پر اساتذہ نے طلبہ کوتعلیم دینے پرتوجہ مرکوز کی،ریاست میں ایس ایس ایل سی اورپی یوسی امتحانات کونہایت کامیابی سے اختتام کوپہنچایاگیا۔
انہوں نے کہا کہ بڑی تعدادمیں طلبہ سرکاری اسکولوں کا رخ کررہے ہیں، یہ ایک قابل مسرت پیش رفت ہے۔ اس موقع پر حکومت کے تعلیمی مشیرایم آرڈورے سوامی،رکن کونسل نارائن سوامی،دیوے گوڈا،ارون شاہ پور،ہنومنت نرانی ودیگراحباب شریک رہے۔