بنگلورو، 2؍ جون (ایس او نیوز)ملک کی تمام حکومتوں کو زراعت،تعلیم،صحت اور صنعتوں کو زیادہ ترجیح دینے بجٹ میں رقم مختص کرنی چاہئے۔یہ بات سابق نائب وزیر اعلیٰ و موجودہ رکن اسمبلی ڈاکٹر جی پرمیشور نے کہی۔

انہوں نے یہاں تعلقہ کے ہولاوناہلی ہوبلی کے بائریناہلی کراس کے قریب محکمہ زراعت،تعلقہ پنچایت،(این آر ایل ایم)ڈاکٹر بی آر امبیڈکر ڈیولپمنٹ کارپوریشن اور تانڈاڈیولپمنٹ کارپوریشن کی طرف سے منعقدہ مستحقین میں مختلف زرعی آلات کی تقسیم کے جلسے سے خطاب کرتے ہوئے کہا کہ حکومت زراعت کو زیادہ ترجیح دے کر غذائی اجناس کی پیداوار میں اضافہ کرنے میں اہم کردار اداکررہی ہے اور اناج کی قلت پیش آنے نہیں دے رہی ہے۔اس سے قبل ریاست کی کانگریس حکومت کے دوران انابھاگیہ اسکیم کے تحت غریبوں کو فی کس پانچ کلو گرام چاول مفت فراہم کرنے کا سلسلہ شروع کیاگیا،جس کے بعد اب فی کس 7کلو چاول فراہم کئے جارہے ہیں۔آئندہ دنوں کانگریس حکومت اقتدار پر آئی تو فی کس 10کلو چاول فراہم کرنے کا منصوبہ زیر غورہے۔پرمیشورنے کہاکہ کورٹ گیرے تعلقہ میں زرعی سرگرمیاں اکثر بارش کے پانی پر ہی منحصر ہیں،آبپاشی کے منصوبوں پر زیادہ توجہ دیتے ہوئے ایتناہولے آبپاشی منصوبہ جاری کیاگیاہے،اس منصوبے سے تعلقہ کے 109تالابوں کو پانی فراہم ہوگا۔

اس موقع پر تحصیلدار ناہیدہ زم زم،محکمہ زراعت کی اڈمنسٹریٹیو آفیسردیپا شری،تعلقہ پنچایت ایگزی کیٹیوآفیسر دوڈاسدیا،گرام پنچایت صدر رام کرشنیا،نائب صدرپٹما،بلاک کانگریس کمیٹی کے صدر اشوتھ نارائن،ارکیرے شنکراوردیگر موجود تھے۔