ٹمکورو ،16؍اگست(ایس او نیوز)سرکاری جونیئرکالج میدان کے احاطے میں موجود مہاتماگاندھی میموریل بھون کو نظر انداز کردیاگیاہے،جو نہایت افسوس ناک ہے۔یہ بات سابق نائب وزیراعلیٰ وکورٹ گیرے کے رکن اسمبلی ڈاکٹر جی پرمیشور نے کہی۔

انہوں نے یہاں شہر کے سرکاری جونیئرکالج میدان میں واقع مہاتماگاندھی میموریل بھون کا دورہ کرکے جائزہ لینے کے بعد اخباری نمائندوں سے خطاب کرتے ہوئے کہاکہ 1932ء اور 1937میں گاندھی جی نے دومرتبہ ٹمکور کا دورہ کیاتھا،اس وقت یہاں کے سرکاری جونیئر کالج میدان میں واقع ایک کمرے میں قیام کیاتھا۔اس کمرے کو گاندھی میموریل بھون کے نام سے منسوب کیاگیاہے، اس کے باوجود اس عمارت کے تعلق سے کوئی توجہ نہیں دی جارہی ہے اور مسلسل نظرا نداز کیاجارہاہے۔مہاتماگاندھی کی اس یاد گار کو ترقی دیناہم سب کی ذمہ داری ہے۔حکومت کو بھی چاہئے کہ زیادہ سے زیادہ فنڈ جاری کرے اور اس یاد گار کی ترقی کیلئے اقدامات کرے یا پھر کارپوریشن کو ہدایت دے کر اس کے ذریعے ترقی دینے کی کوشش کرے۔ضلع انتظامیہ کو چاہئے کہ اس معاملے میں خصوصی توجہ دے۔ایسی یادگاریں ملناہی مشکل ہے،تحریک آزادی کے دوران گاندھی جی نے یہاں قیام کیاتھااوراس وقت کے کانگریس قائدین کے ساتھ اجلاس منعقد کیاتھا،یوں اس یادگار کو بہت اہمیت حاصل ہے،اسے ترقی دینا اور اس کی حفاظت ضروری ہے۔ان یادگاروں کی حفاظت ممکن نہیں ہوسکی تو آئندہ نسل کیلئے اور یہاں تعلیم حاصل کررہے طلبہ کو گاندھی جی کے قیام کے تعلق سے جانکاری دینے میں بھی مشکل پیش آئے گی۔

اس موقع پر کے پی سی سی جنرل سکریٹری مرلی دھر ہالپا،سیمنٹ منجو،پرکاش،سوم شیکھراور دیگر موجود تھے۔