حکومت مسعود معاملہ کا کریڈٹ نہ لے،ہم نے ہی کارروائی شروع کردی تھی:کانگریس
نئی دہلی :02 /اپریل(ایس اونیوز /آئی این ایس انڈیا) کانگریس نے پاکستانی دہشت گردتنظیم جیش محمد کے سرغنہ مسعود اظہر کو اقوام متحدہ کے ذریعہ بین الاقوامی دہشت گرد قراردینے کو ایک طویل اور مسلسل عمل کا نتیجہ بتایا اور الزام لگایاکہ وزیراعظم نریندرمودی اور انکی حکومت ہر حصولیابی کا کریڈٹ لینے لگتے ہیں۔کانگریس ترجمان راجیوشکلا اور راگنی نائک نے جمعرات کو یہاں پارٹی ہیڈکوارٹر میں صحافیوں سے کہاکہ جس دہشت گردکوبین الاقوامی دہشت گرد قراردیئے جانے کو مودی حکومت اپنی کامیابی بتانے کی کوشش کررہی ہے،اس کے لیے سابق وزیراعظم منموہن سنگھ کی قیادت والی حکومت نے بہت پہلے ہی اسکا عمل شروع کردیاتھا۔اس سلسلہ میں انھوں نے اقوام متحدہ کو خط لکھے اور اسکی بنیاد پر مسعود اظہر کو اب عالمی دہشت گردقراردیاگیاہے۔انھوں نے مسعود اظہر کو بین الاقومی دہشت گرد قراردیے جانے کا خیر مقدم کیا اور اس عمل کی تکمیل میں تعاون کے لیے چین کا بھی شکریہ اداکیا لیکن کہاکہ پاکستان کو ایمانداری سے اس دہشت گرد پر پوری طرح سے پابندی لگانے کے لیے پاکستان کو اپنا کردار اداکرنا چاہئے۔عالمی دہشت گرد قراردیے جانے کے بعد اسکی سرگرمیوں پر پوری طرح سے پاندی لگائی جانی چاہیے۔