نئی دہلی 10 نومبر (ایس او نیوز) قومی سطح  کی پہلوان اور کُشتی کے انٹرنیشنل  مقابلوں  میں ملک  کا نام روشن کرنے والی  ریسلر نشاء داہیا  کے تعلق سے میڈیا میں رپورٹ نشر  ہوئی تھی کہ اُسے  آج بدھ کو نامعلوم لوگوں نے قتل کردیا ہے۔ میڈیا میں آئی رپورٹوں میں بتایا گیا تھا کہ   واردات ہریانہ کے سونی پت گاوں ہلال پور میں ریسلنگ اکیڈمی میں  پیش آئی اور نامعلوم لوگوں نے اس پر اور اس کےساتھ موجود بھائی پر گولیوں کی بوچھاڑ کردی جس میں نشاء داہیا سمیت اس کے بھائی نے  جائے وقوع پر ہی دم توڑ دیا، جبکہ  ان کے ساتھ موجود ان کی ماں کو بھی گولیاں لگی ہیں اور اس کی حالت نازک ہے۔  مگر میڈیا میں آئی یہ خبر  بعد میں جھوٹی ثابت ہوئی ہے اور خود نشاء داہیا نے انسٹاگرام میں اپنے محفوظ ہونے کی وڈیو پوسٹ کردی ہے۔

یاد رہے کہ  گذشتہ جمعہ کو ہی  بلگریڈ ، سربیا میں منعقدہ کُشتی کے انڈر۔23 ورلڈ ریسلنگ چمپن شپ میں نشاء نے 65 کلو    وزنی زمرے میں   انڈیا کے لئے  برونز میڈل حاصل کیا تھا جس پر وزیراعظم نریندر مودی نے انہیں مبارکباد پیش کی تھی۔

تمام بڑے نیشنل میڈیا میں ان کی موت کی خبر  نشر کئے  جانے  کے بعد خود نشاء نے ہی اپنے انسٹاگرام صفحہ پر ایک  وڈیو جاری کرتےہوئے بتایا کہ  وہ اپنا اگلا میچ کھیلنے کےلئے گونڈا پہنچی ہے اور وہ وہاں بالکل ٹھیک ہے۔

میڈیا میں آئی خبروں میں اس بات کی بھی جانکاری دی گئی ہے کہ ان کا بھائی بھی ٹھیک ہے اور اس کی ماں  بھی ٹھیک ہے اور کسی پر کوئی حملہ نہیں ہوا ہے۔