گوکرن:11؍جون (ایس اؤ نیوز) سیاحوں کو ریسارٹ میں قیام کی سہولت فراہم کرنے کے بعد متعلقہ افسران کو جانکاری نہ دینے کے الزام  میں ایم جی ریسارٹ کے مالک رمیش پنڈت کو پولس نے گرفتارکرلیاہے۔

ہریانہ کے سافٹ وئیر انجنئیر رشبھ کمار سنگھ کل بدھ کو  سمندر میں ڈوب کر ہلاک ہونے کے بعد ریسارٹ میں سیا ح ہونے کا پتہ چلا ہے۔ مہلوک پچھلے دودنوں سے اپنی رشین سہیلی ایلینا فٹیسوا کے ساتھ ریسارٹ میں قیام  پذیر  تھا۔ بدھ کی صبح دونوں سمندر میں تیرنے گئے تو یہ حادثہ پیش آیا ۔ بیرونی ملک کی شہری کے متعلق ’سی فارم ‘ پُر نہ کرنے اور دو دن کے بعد بھی متعلقہ افسران کو  جانکاری نہ دیتے ہوئے غفلت برتنے کے الزام میں ہوٹل مالک کو  گرفتار کرلینےکی پولس ذرائع نے خبردی ہے۔ خیال رہے کہ لاک ڈاؤن اعلان کے بعد بیرونی سیاحو ں کی گوکرن داخلے پر پابندی عائد کی گئی ہے۔

سافٹ وئیر انجنئیر ہلاک :بدھ کو گوکرن کے کُڈلے بیچ پر ہریانہ سے تعلق رکھنے والے سافٹ وئیر انجنئیر رشبھ کمار سنگھ(37) سمندر میں تیرنے کے دوران  ڈوب ہوکر ہلاک ہوگیا، اس کی ابتدائی رپورٹ ساحل آن لائن پر بدھ کی شام کو ہی شائع ہوچکی ہے۔  پتہ چلا ہے کہ مہلوک بنگلورو میں روزگار تھا۔  یہ دودن پہلے اپنی رشین سہیلی کے ساتھ ریسارٹ میں مقیم تھا۔ بدھ کی صبح دونوں سمندر میں تیرنے گئے تو سافٹ انجنئیر رشبھ ڈوب کر ہلاک ہوگیا۔

قریب میں تیر رہی روس کی شہری مہلوک کی سہیلی ایلینا کو تیرنے کے دوران میں  رشبھ خطرے میں گھرا ہوا محسوس ہوا تو  اُس نے اُسے بچانے کی کوشش کی اور ایسے ویسے کرکے اپنے ساتھی کو کنارے تک لانے میں کامیاب ہوگئی،  لیکن تب تک پانی پی پی کر رشبھ ہلاک ہوچکا تھا۔ گوکرن پی ایس آئی نوین نائک نے بتایا کہ کیس درج کرلیاگیا ہے ، مہلوک کے خاندان والوں کو اطلاع دی گئی ہے، وہ جب یہاں پہنچیں گے تو پوسٹ مارٹم کے بعد نعش پسماندگان  کے حوالے کی جائے گی ۔

 کورونا وباء کے چلتے عوام نے اس بات پر سخت اعتراض جتایا ہے کہ سیاحوں پر نگرانی کرنے والے چک پوسٹ نکال دینے کا یہ نتیجہ ہے۔ عوام  مطالبہ کررہے ہیں کہ ضلع انتظامیہ اس طرف توجہ دے اور  ریسارٹ اور لاڈ جوں میں تھرمل اسکیانر نصب کرنا لازمی قرار دیں۔