پنجی، 8 اگست(ایس او نیوز/آئی این ایس انڈیا) گوا پردیش کانگریس کمیٹی (جی پی سی سی) کے صدر گریش چوڈنکر نے کہا ہے کہ گوا کانگریس، گوا کے اسمبلی میں ان 10 باغی ممبران اسمبلی کی معطلی کے لئے درخواست دائر کرے گی، جنہوں نے بھارتیہ جنتا پارٹی (بی جے پی) کی رکنیت لی تھی۔کانگریس ممبران اسمبلی کے بی جے پی میں شامل ہونے کے قریب ایک ماہ بعد ایسی رائے آئی ہے۔جس وقت کرناٹک کانگریس اور جنتا دل سیکولر کی حکومت گرنے کے قریب تھی، اسی وقت کانگریس کے 10 ممبران اسمبلی ایک ساتھ بی جے پی میں شامل ہو گئے تھے۔گوا میں پہلے کانگریس کے پاس تعداد بھارتیہ جنتا پارٹی سے زیادہ تھی۔کانگریس کے پاس کے کل 15 ممبران اسمبلی تھے، ان میں سے 10 رکن اسمبلی بی جے پی میں شامل ہو گئے تھے،2 تہائی سے زیادہ تعداد ہونے کی وجہ سے ان ممبران اسمبلی پر دل بدل قانون نافذ نہیں ہو سکا تھا۔گوا میں کل 40 اسمبلی سیٹیں ہیں۔کانگریس کے 10 باغی اراکین اسمبلی کے شامل ہونے کے بعد سے اسمبلی میں بی جے پی کی تعداد 27 ہو گئی ہے،اگرچہ اکثریت کے لئے 21 ممبران اسمبلی کی ضرورت ہوتی ہے،موجودہ وقت میں کانگریس کے پاس 5، جی ایف پی کے پاس 3، این سی پی اور ایم جی پی کا ایک ایک اور تین آزاد ممبر اسمبلی ہیں۔بی جے پی کو تینوں آزاد ممبران اسمبلی کی بھی حمایت مل گئی تھی۔سال 2017 کے گوا اسمبلی انتخابات میں بی جے پی اور کانگریس دونوں ہی اکثریت سے کافی دور تھے لیکن اب بی جے پی گوا میں اکثریت میں ہے۔جب کانگریس کے ممبر اسمبلی بی جے پی میں شامل ہوئے تھے، تب اپوزیشن پارٹیوں نے بی جے پی پر ہارس ٹریڈنگ کا الزام لگایا تھا۔