آئی پی ایل 2020: کوچ کمبلے نے کہا: کرس گیل کا کردار اہم ہوگا
دبئی،09/ستمبر(آئی این ایس انڈیا)کنگز الیون پنجاب کی نظر انڈین پریمیر لیگ کے 13 ویں سیزن میں پہلی بار ٹائٹل جیتنے پر ہے۔ انیل کمبلے کنگز الیون پنجاب کی کوچنگ کررہے ہیں، جبکہ کے ایل راہل کی شاندار فارم کو دیکھتے ہوئے کپتانی کی ذمہ داری سونپی گئی ہے۔ انیل کمبلے نے انکشاف کیا ہے کہ رواں سیزن میں 41 سالہ کرس گیل کا کردار اہم ہونے جا رہا ہے۔ اس کے علاوہ انیل کمبلے نے بھی آئی پی ایل ٹیموں میں ہندوستانی کوچ نہ ہونے پر تشویش کا اظہار کیا ہے۔انیل کمبلے آٹھ فرنچائز ٹیموں میں واحد ہندوستانی ہیڈ کوچ ہیں۔ کمبلے کو لگتا ہے کہ یہ اعداد و شمار ملک میں کوچنگ کی صحیح تصویر پیش نہیں کررہے ہیں۔ کمبلے نے کہاکہ میں آئی پی ایل میں مزید ہندوستانی کوچ دیکھنا چاہتا ہوں۔ میں آئی پی ایل میں بہت سے ہندوستانیوں کو ہیڈ کوچ کی حیثیت سے دیکھنا چاہتا ہوں۔گزشتہ دو سیزن کی طرح آئندہ آئی پی ایل میں 40 سالہ گیل کو مزید مواقع دینے پر بھی کمبلے نے کہاکہ گیل اس سیزن میں بھی لیڈرشپ گروپ میں شامل ہوں گے، جہاں ان کا کردار بہت اہم ہوگا، جیسے ٹاپ آرڈر میں بیٹنگ کے دوران ہوتا۔ گیل کے علاوہ گلین میکسویل، کرس جورڈن، جمی نیشام، نکولس پورن، مجیب زدران، ہارڈس ویل جون اور ساڑھے آٹھ کروڑ کی بولی کے ساتھ ٹیم میں شامل ہوئے شیلڈن کوٹریل غیر ملکی کھلاڑی ہیں۔کمبلے نے بتایا ہے کہ گیل کا کردار اہم ہوگا۔ نوجوان کھلاڑی ان کے قائدانہ صلاحیتوں اور تجربے سے سیکھنا چاہیں گے۔ انہیں ہم صرف ایک بلے باز کی حیثیت سے نہیں دیکھ رہے ہیں، وہ نوجوان کھلاڑیوں کی ترقی میں اہم کردار ادا کریں گے۔