کمٹہ :بیچ سڑک پرالٹ گیاگیس ٹینکر ۔ ٹریفک کا رخ موڑ دیا گیا۔گیس اخراج کے پیش نظر اطراف کے مکانات کیے گئے خالی
کمٹہ،27؍ستمبر (ایس او نیوز) کمٹہ تعلقہ کے ہندیگون علاقے میں نیشنل ہائی وے 66 پر ایک گیس سے بھرا ہوا ٹینکر الٹ گیا جس کے بعد گیس کے اخراج کا خطرہ دیکھتے ہوئے موٹر گاڑیوں کی آمد وفت کا رخ موڑنے کے علاوہ اطراف میں موجود مکانات سے 100سے زائد خاندانوں کو دوسرے محفوظ مقامات پر منتقل کروایا گیا۔
ذرائع سے ملی اطلاع کے مطابق منگلورو سے ہبلی جانے والا ہندوستان پٹرولیم کا ٹینکر سنیچر کے دن صبح میں بے قابو ہوکربیچ سڑک پرہی الٹ گیا تھا۔اس کے بعد وقفے وقفے سے اس میں سے تھوڑی مقدار میں گیس خارج ہونے لگی ۔فوری طور پر پولیس اور فائر بریگیڈ کے عملے نے موقع پر پہنچ کر حفاظتی اقدامات کیے۔
دوسری طرف سڑک پر گاڑیوں کی آمد و رفت روک دی گئی تو تقریباً 4کلومیٹر تک گاڑیوں کی قطار لگ گئی۔ پھر پولیس نے چنداور کے پاس سے موٹر گاڑیوں کا رخ موڑ دیا ۔ سنیچر کی رات کو 2خالی ٹینکروں کے ساتھ منگلورو سے ٹیکنیکل ٹیم جائے حادثہ پر پہنچ گئی اور سڑک پرپڑے ہوئےٹینکر سے گیس خالی کرنے اور سڑک پر سے اس کو ہٹانے کی کارروائی شروع کی جو اتوار کے دن صبح تک چلنے کا امکان تھا ، اس کی وجہ سےکسی بڑے المناک حادثے کے امکانات پیدا ہو گئے تھے ۔ لہذا پولیس نے لاؤڈ اسپیکر پر علاقے کے عوام کو مخاطب کرتے ہوئے انہیں یہاں سے وقتی طور پر گھر خالی کرکے محفوظ مکانات کی طرف منتقل ہونے کی ہدایات دیں۔اس طرح الوی کوڈی اور ہندیگون علاقے سے لوگ دوسرے مقامات پر رہائش پزیر اپنے اپنے رشتے داروں یا جان پہچان والوں کے مکانات میں چلے گئے۔
یاد رہے کہ 2015 میں ہی کمٹہ کے برگی علاقے میں اسی قسم کا ایک بھیانک حادثہ پیش آیا تھا میں گیس ٹینکر سڑک پر الٹنے کے بعد اس سے خارج ہونے والی گیس سے قریب کے مکانات میں دھماکے ہوئے تھے اور آگ لگنے کی وجہ سے 14افراد کی موت واقع ہوگئی تھی۔اس کے بعد بھی کئی مرتبہ کمٹہ میں اور خاص کرکے ہندیگون علاقے میں گیس ٹینکر سڑک پر الٹ جانے کے حادثے پیش آتے رہے ہیں، اور یہ سلسلہ اب بھی جاری ہے۔