گنگولی:24؍ ڈسمبر(ایس اؤ نیوز) توحید ویمن ڈگری کالج گنگولی کے شعبہ انٹرنل کوالٹی ایشورنس سیل (IQAC)اور محکمہ پولس کے اشتراک سے 23دسمبر 2021بروز جمعرات کو توحید آڈیٹوریم میں انسداد جرائم کے متعلق پروگرام کا انعقاد کیا گیا۔

کنداپور کے ڈی وائی ایس پی مسٹر شری کانت نے طالبات سے خطاب کرتے ہوئےسائبرکرائم، نارکوٹکس اور موٹر وھیکل جرائم کے متعلق مفصل روشنی ڈالی اور متعلقہ جرائم کی روک تھام کے لئے کیا طریقے اپنانے ہیں ، جرم ہونے پر کونسی اور کتنی سزا ملے گی وغیرہ پر بات کی۔ گنگولی پولس تھانہ کے پی ایس آئی ننجا نائک نے نابالغ بچوں کےساتھ ہونے  والے پوکسو ، عصمت دری ، بدسلوکی  جیسے جرائم کا احاطہ کرتےہوئے طالبات کو ایسی حرکتوں سے دور رہنے کی صلاح دی۔

توحید ٹرسٹ کے ایگزکٹیو ڈائرکٹر ڈاکٹر محمد امجد نے سائبر، انٹرنیٹ اور سوشیل میڈیا کےذریعے ہونے والے جرائم کو بیان کرتے  ہوئے طلباسے درخواست کی کہ وہ ڈیجٹیل ڈیوائز اور مشکوک پیش کشوں کا شکا ر نہ بنے۔ جماعت المسلمین گنگولی کے صدر پی ایم حسینار نے اپنے خطاب میں کہاکہ 14سوسال پہلے ہی اسلام نے جرائم سے اجتناب اور ا س کے ذریعے معاشرے پر ہونے والے برے اثرات کو تفصیلی طورپر بیان کیا ہے۔ اس موقع پر انہوں نے سبھی طبقات اور دھرموں کے لوگوں سے اپیل کی کہ وہ اپنی مقدس کتابوں کا مطالعہ کریں اور سماج میں امن اور ہم آہنگی کے ساتھ زندگی گزاریں۔

اس کے بعد پولس افسران اور طلبا کے درمیان تبادلہ خیال اور سوال جواب کا سیشن ہوا۔ جس میں طلبا کی طرف سے پوچھے گئے سوالات اور خدشات کا تشفی بخش جواب دیا گیا۔ توحیدٹرسٹ کے خازن عبدالحمید شیخ نے پروگرام کی صدارت کی۔

پروگرام کا آغاز محترمہ اقصیٰ کی تلاوت قرآن سے ہوا۔ محترمہ عائشہ ہانیہ اور محترمہ فاطمہ نے بالترتیب کنڑا اور انگریزی میں ترجمہ پیش کیا۔ ایڈمنسٹریٹر اختر احمد خان اور محترمہ صفا سعید  نے مہمانوں کا استقبال کیا۔ محترمہ صفا سعید نے کالج کی پرنسپال آشا نائک نے افتتاحی کلمات پیش کئے ۔ محترمہ اسمیہ مولانا نے شکریہ کلمات پیش کئے اور محترمہ خولہ قاضی نے نظامت کے فرائض انجام دئیے۔  محمد ابراہیم چوگلے ، منیر احمد خان اورمطہر ایم ایچ ڈائس پر موجود تھے۔ پروگرام میں انتظامیہ کے اراکین، پرنسپلز، صدور مدرس اور توحید اداروں کاعملہ ، والدین و سرپرست ، شہر کی معزز شخصیات سمیت کالج کی سیکڑوں طالبات شریک تھیں۔