بھٹکل میں موسلادھار بارش کاسلسلہ جاری، حنیف آباد کی سڑک تالاب میں تبدیل؛ کئی مکانوں میں پانی داخل ہونے کی شکایتوں کے بعدتحصیلدار کا دورہ
بھٹکل:20؍جولائی (ایس اؤ نیوز)گزشتہ دو دنوں سے برس رہی بارش کے نتیجےمیں تعلقہ کے ہیبلے گرام پنچایت حدود کے حنیف آباد کی سڑک تالاب میں تبدیل ہونے کے ساتھ ساتھ سڑک پر جمع پانی پاس پڑوس کے گھروں میں بھی گھسنے سے عوام پریشانی میں مبتلا دیکھے گئے۔
اطلاع پاتے ہی تحصیلدار وی پی کوٹرلّی نے جائے وقوع کا دورہ کرتےہوئے عوام کی شکایات کو سماعت کیا۔ اس کے بعد پنچایت عملے کو وہاں بلا کر پانی کے بہاؤ کے لئے راستہ بنایا۔ جس کے نتیجے میں علاقے کے عوام نے راحت کی سانس لی۔
تعلقہ بھر میں جمعہ کی صبح سے سنیچر کی صبح تک 94 ملی میٹر بارش ریکارڈ کی گئی ہے۔ اس سال اب تک 1590 ایم ایم بارش تک کا اضافہ درج کیا گیا ہے۔ محکمہ موسمیات کے مطابق اگلے دو تین دنوں تک مزید بارش جاری رہنے کے امکانات ہیں۔