بنگلورو، 25/فروری(ایس او نیوز) متعدد مقدمات میں پولیس کو مطلوب انڈرورلڈ ڈان روی پجاری کو پیر کی صبح اولین ساعتوں میں کرناٹکا پولیس کی ٹیم سنیگیل سے بنگلورو لے آئی۔ بنگلورو آمد کے بعد اسے شہر کی عدالت میں پیش کیا گیا جہاں اسے 14؍ دن کی پولیس حراست میں دیا گیا۔

اس سے پہلے 2018 میں بھی سنیگیل کی پولیس نے روی پجاری کو گرفتار کیا تھا اور تب بھی ہندوستان کی پولیس نے اسے تحویل میں لینے کی کوشش کی لیکن اس وقت ہندوستان کے دعوے کو حکومت سنیگل نے تسلیم نہیں کیا۔ اب جبکہ سنیگیل کی پولیس نے روی پجاری کو دوبارہ گرفتار کیا اسے فوراً کرناٹکا پولیس کے حوالے کردیا گیا۔

پیر کے روز بنگلورو لانے کے بعد پولیس نے اس بدنام زمانہ غنڈے کو شہر کی پہلی اڈیشنل چیف میٹر و پولٹن مجسٹریٹ کی عدالت میں پیش کیا۔ اس کے خلاف 100 سے زیادہ مقدمات درج ہیں ان کے بارے میں پوچھ گچھ کے لئے اسے عدالت نے 14 دن کی پولیس حراست میں دیدیا ہے ۔

جب روی پجاری کو عدالت میں پیش کیا گیا تو پولیس کی طرف سے وکیلوں نے مانگ کی کہ اس ےپولیس کی حراست میں دیا جائے جج نے اس کی منظوری دی اور 14 دن تک پولیس کی حراست میں دیدیا۔

بتایا جاتا ہے کہ روی پجاری کی گرفتاری اور اسے بنگلورو لائے جانے کے بعد اس کے مختلف معاملوں کی جانچ میں این آئی اے اور خفیہ ایجنسی راکے بھی جڑ جانے کا قوی امکان ہے۔