پیرس، 30؍جنوری (ایس او نیوز؍ایجنسی ) فرانس کی سرکردہ ٹریڈ یونینوں کی طرف سے بلائے گئے پنشن اصلاحات کے منصوبے کے خلاف 31 جنوری کو 200 سے زیادہ مقامات پر ہڑتال کی جائے گی، جو ریٹائرمنٹ کی عمر میں اضافے کے خلاف دوسرا ملک گیر مظاہرہ ہوگا۔ یہ اطلاع میڈیا نے دی۔

براڈکاسٹر بی ایف ایم ٹی وی کے مطابق پیرس پبلک ٹرانسپورٹ آپریٹر آر اے ٹی پی گروپ کے ساتھ ساتھ پیرس چارلس ڈی گال ہوائی اڈے کے ملازمین اور فنیکولر ریلوے ورکرز کی ٹریڈ یونینوں نے پہلے ہی ہڑتال میں شرکت کا اعلان کر دیا ہے۔

فرانسیسی وزیر اعظم ایلزبتھ بورن نے 10 جنوری 2023 کو پنشن اصلاحات کے قانون کا مسودہ پیش کیا، جس پر ستمبر 2023 میں عمل درآمد کا منصوبہ بنایا جا رہا ہے۔ اس کے مطابق فرانسیسی حکومت یکم ستمبر سے ملک میں ہر سال ریٹائرمنٹ کی عمر میں تین ماہ کا اضافہ کرنا شروع کر دے گی اور بتدریج اسے 2030 تک موجودہ عمر کی 62 سال سے بڑھا کر 64 کر دی جائے گی۔

اس اصلاحات کے خلاف پہلا ملک گیر مظاہرہ 19 جنوری کو فرانس کی آٹھ بڑی ٹریڈ یونینوں نے منعقد کیا جس میں تقریباً 20 لاکھ افراد نے حصہ لیا۔ پورے فرانس میں 200 سے زائد مقامات پر ہڑتالیں ہوئیں اور سب سے زیادہ مظاہرے پیرس، مارسیلی، لیون، ٹولوس، للی اور نانٹیس میں ہوئے۔