بھٹکل ویلفئیر اسپتال میں فری ہارٹ چیک آپ کیمپ کا خوبصورت افتتاح؛ دو روزہ کیمپ کے لئے بھٹکل سمیت اطراف کے عوام کی بھی کثیرتعداد میں شرکت
بھٹکل 27/جولائی (ایس او نیوز) میترا اسپتال کالی کٹ (کیرالہ) کے اشتراک سے یہاں سنیچر کو ویلفئیر اسپتال میں مفت ہارٹ چیک آپ کیمپ کا خوبصورت افتتاح کیا گیا جس میں مہمان خصوصی کے طور پر تشریف فرما بھٹکل مسلم خلیج کونسل کے جنرل سکریٹری اور سعودی عربیہ کے معروف بزنس ٹائیکون جناب محمد یونس قاضیا نے اپنے تاثرات پیش کرتے ہوئے میترا اسپتال کی تعریف کی اور کہا کہ کالی کٹ میں واقع یہ اسپتال علاج معالجہ کے لئے سب سے بہترین ہے، جتنی شاندار اسپتال کی عمارت ہے ، اُتنے ہی بہترین میترا کے ڈاکٹرس اور اُن کا ٹریٹمنٹ ہے۔ بھٹکل میں پہلی بار منعقد کئے گئے ہارٹ چیک آپ کیمپ پر نہایت خوشی کا اظہار کرتے ہوئے انہوں نے اس بات کا یقین دلایا کہ وہ میترا اسپتال کے ذمہ داران سے گفتگو کرتے ہوئے بھٹکل اور اطراف کے مریضوں کو خصوصی رعایت دلانے اور اُن کے لئے خصوصی سہولت فراہم کرانے کی کوشش کریں گے۔
اعزازی مہمان کے طور پر تشریف فرما بھٹکل سرکل پولس انسپکٹر گنیش نے میڈیکل کیمپ منعقد کرنے پر ذمہ داران کو مبارکباد پیش کی اور بھٹکل کے مریضوں کے لئے سہولت فراہم کرنے پر ویلفیر اسپتال سمیت میترا اسپتال کی پوری ٹیم کی سراہنا کی اور نیک خواہشات کا اظہار کیا۔ میترا اسپتال کے کنسلٹنٹ کارڈیالوجسٹ ڈاکٹر شاج الدین نے دل کے امراض اور اس کے تدارک پر مختصر گفتگو کی۔میترا اسپتال کے مینجر مُرلی تھراوٹ نے بہترین پیمانے پر بھٹکل میں کیمپ منعقد کرنے پر منتظمین کا شکریہ ادا کیا۔ ویلفیر اسپتال کے نائب صدر جناب ایس کے صلاح الدین نے پروگرام کی صدارت کرتے ہوئے اسپتال کا مختصر تعارف پیش کیا جس میں انہوں نے بتایا کہ بھٹکل میں عوام کی سہولت اور مریضوں کو بہتر علاج فراہم کرنے کی غرض سے ویلفیر اسپتال قائم کیا گیا ہے اور اس اسپتال کا مقصد پیسہ کمانا نہیں ہے۔ اسپتال میں خدمات انجام دینے والے اور سرگرم سماجی کارکن ڈاکٹر ظہیر کولا نے پروگرام کی نظامت کرنے کے ساتھ ساتھ آخر میں کلمہ تشکر پیش کیا۔
پروگرام کا آغاز حافظ امین ذہیب دامودی کی تلاوت کلام پاک سے ہوا تھا، مُبشر حُسین ہلارے نے افتتاحی کلمات پیش کئے تھے۔دبئی جماعت کے سابق جنرل سکریٹری جیلانی محتشم، بھٹکل مسلم یوتھ فیڈریشن کے جنرل سکریٹری محمد نصیف خلیفہ، سماجی کارکن محمد یونس رکن الدین، محمد یحیٰ ہلارے، مولوی صفوان موٹیا ندوی سمیت کافی دیگر ذمہ داران موجود تھے۔
ویلفیر اسپتال کے ایڈمنسٹریٹر ابوالاعلیٰ برماور نے بتایا کہ دو روزہ ہارٹ چیک آپ کیمپ کے لئے بھٹکل سمیت اطراف کے علاقوں کے عوام نے بھی فون کے ذریعے کثیر تعداد میں اپنے نام رجسٹرڈ کرائے ہیں، انہوں نے بتایا کہ دو سو ناموں کے اندراج کے بعد مزید ناموں کا رجسٹریشن بند کردیا گیا کیونکہ دو دن کے کیمپ میں اس سے زائد مریضوں کی تشخیص کرنا ممکن نہیں ہے۔
خیال رہے کہ ملک کے مشہور کارڈیالوجسٹ اور میترا اسپتال کے ڈائرکٹر اینڈ چیف آف کلینکل سروس ڈاکٹر علی فیضل آج کیمپ کے پہلے دن شریک نہیں ہوسکے، بتایا گیا ہے کہ وہ کل اتوار کو کیمپ کے دوسرے اور آخری دن شریک ہوں گے۔ دل کے مریضوں کی مفت تشخیص کے اس کیمپ میں میترا اسپتال کی طرف سے مفت ای سی جی اور ایکو سمیت خون کی جانچ کا بھی انتظام کیا گیا ہے اور میترا اسپتال کے اسٹاف کے ساتھ ساتھ ویلفیر اسپتال کے اسٹاف بھی کیمپ کے لئے اپنی خدمات انجام دے رہے ہیں۔