بھٹکل:6؍ اپریل(ایس اؤ نیوز)بھٹکل کی معروف شخصیت اور جے ڈی ایس لیڈر عنایت اللہ شاہ بندری ابھیمانی بلگا اور کنداپور کوٹیشور امرتیشوری آیورویدا اسپتال کے اشتراک سے سرکاری آیورویدا میڈیکل کالج بنگلورو کے تعاون سے 10اپریل 2021 بروز سنیچر عاقب ولّا شادی ہال میں مفت آیورویدا ہیلتھ چیک آپ کیمپ منعقد کیا گیا ہے جس میں بھٹکل سمیت اطراف کے عوام سے بھی درخواست کی گئی ہے کہ وہ اس کیمپ میں اپنی صحت کی جانچ کرتے ہوئے فائدہ اُٹھاسکتے ہیں۔
اتوار کو بھٹکل میں منعقدہ پریس کانفرنس میں کوٹیشور امرتیشوری آیورویدا اسپتال کے ڈاکٹر پرسنا نے بتایا کہ فری کیمپ میں اعصابی بیماریوں ، آنکھ، کان، ناک، زبان سے تعلق رکھنے والے امراض اور نسوانی امراض کی جانچ اور علاج کیا جائے گا۔ انہوں نے بھٹکل کے عوام سے متعلقہ کیمپ سے استفادہ کرنےکی اپیل کی۔
بنگلورو سرکاری آیورویدا کالج اور اسپتال کے ڈاکٹر شری دھر نے کہاکہ دنیا بھر میں جڑی بوٹیوں پر مشتمل آیورویدک دوائیوں کی بڑی اہمیت ہے۔ حالیہ دنوں میں عوام کورونا سے کافی خوف کھائے ہوئےہیں۔ ایسے میں وقت پر کھاناکھانے اور ضروریات سے فارغ ہونے سے انسان صحت مند رہتاہے۔ بیمارہونے سے پہلے اپنے جسم کو صحت مند بنائے رکھیں گے تو بیماری میں مبتلا ہونےکے خطرات کم ہوتےہیں۔ اسی بات کو لےکر بھٹکل میں آیورویدا کیمپ کا انعقاد کیا جا رہا ہے۔ انہوں نے بتایا کہ کیمپ میں مریضوں کو مفت دوائیاں تقسیم کی جائیں گی۔ پریس کانفرنس میں عنایت اللہ شاہ بندری سمیت کیمپ کے کنوینر محمد صادق مٹا بھی موجود تھے۔